ဆောက်သမ်တန် ၂-၃ မန်ချက်စတာယူနိုက်တက်
အသက် (၃၃)နှစ်အရွယ်တိုက်စစ်မှူး ကာဗာနီက အရန်ခုံက ထလာပြီး အသင်းအတွက် အရေးပါတဲ့ သွင်းဂိုးနှစ်ဂိုးကို သွင်းပေးခဲ့တယ်။ ဒီဂိုးတွေကြောင့် မန်ယူအသင်းက (၂)ဂိုးရှုံးအနေအထားကနေ ချေပဂိုး၊ အနိုင်ဂိုးတွေ ပြန်ရပြီး အဖိုးတန် (၃)မှတ်ကိုပါ ရယူနိုင်ခဲ့တယ်။ ဂျိမ်းစ်ဝက်ဒ်ပရောက်က ပထမပိုင်းမှာ မန်ယူအသင်းကို ဒုက္ခပေးခဲ့ပြီး လှပတဲ့ ဖရီးကစ်ကန်ချက်မတိုင်ခင်၊ ဘတ်နာရက်ခ်ရဲ့သွင်းဂိုးကိုလည်း ဖန်တီးပေးနိုင်ခဲ့တယ်။ ဆိုးလ်ရှားကတော့ အခွင့်အရေးတွေ ဖြုန်းတီးနေတဲ့ မန်ယူအသင်းကို ကြည့်နေရင်း စိတ်ပျက်နေပုံပေါ်တယ်။ နောက်တော့ ဒီဟေးယား ဒဏ်ရာရသွားပြီး သူ့အစား ဟန်ဒါဆန်ကို လူစားလဲခဲ့တယ်။
ဒုတိယပို်င်းမှာ အလုပ်သိပ်မဖြစ်တဲ့ မေဆင်ဂရင်းဝုဒ်နေရာမှာ ကာဗာနီနဲ့အစားထိုးဖို့ ဆုံးဖြတ်လိုက်တယ်။ (၃၉)နှစ်အရွယ် ဇလာတန်နဲ့ (၃၅)နှစ်အရွယ် စီရော်နယ်လ်ဒိုတို့ ဥရောပမှာ ဂိုးတွေသွင်းနေချိန် ကာဗာနီကို ခေါ်ပြီး နေရာမပေးရဲတဲ့ ဆိုးလ်ရှားရဲ့မှန်ကန်တဲ့ဆုံးဖြတ်ချက်ကပဲ မန်ယူအသင်းကို ကယ်တင်နိုင်ခဲ့တယ်လို့လည်းဆိုရမယ်။ ကာဗာနီဝင်လာကတည်းက ဆောက်သမ်တန်ခံစစ်ကို အဆက်မပြတ်ခြိမ်းခြောက်နိုင်ခဲ့ပြီး ဘရူနိုဖာနန်ဒက်စ်၊ ရပ်ရှ်ဖို့ဒ်တို့နဲ့ တွဲဖက်ကစားပုံလည်း ပိုကောင်းလာခဲ့တယ်။ (၂၃)နဲ့ (၃၃) မိနစ်တွေမှာကတည်းက ဂိုးတွေ သွင်းထားတဲ့ ဆောက်သမ်တန်က ခံစစ်မှာ ပိုအလုပ်များလာခဲ့ပြီး မန်ယူက ပွဲကို စိုးမိုးလာနိုင်ခဲ့ တယ်။
(၅၉)မိနစ်မှာတော့ ဘရူနိုဖာနန်ဒက်စ်ရဲ့ လမ်းကြောင်းပြောင်းဝင်တဲ့ သွင်းဂိုးက မန်ယူအသင်းကို ပိုအရှိန်တက်လာစေပြီး၊ ပွဲ Tempo ကို စိတ်ကြိုက်ထိန်းချုပ်နိုင်တာက မန်ယူဖြစ်လာတယ်။ ကာဗာနီက ဆောက်သမ်တန်အတွက် ထိန်းချုပ်ရခက်တဲ့ ကစားသမားဖြစ်ခဲ့ပြီး မန်ယူအသင်းရဲ့ High Pressure ကိုလည်း ဆောက်သမ်တန် ထိန်းချုပ်နိုင်စွမ်းမရှိခဲ့ဘူး။ ပွဲချိန် (၇၄)မိနစ်မှာ မန်ယူ သရေဂိုးရခဲ့ပြီး ဘရူနိုဖာနန်ဒက်စ်ရဲ့ကန်ချက်ကတစ်ဆင့် ကာဗာနီက ခေါင်းတိုက်သွင်းယူခဲ့တယ်။ နာကျင်အချိန်ပိုမှာလည်း ကွင်းလယ်မှာရတဲ့ ဖရီးကစ်ကို ဘရူနိုက ရပ်ရှ်ဖို့ဒ်ဆီပေးခဲ့ပြီး ရပ်ရှ်ဖို့ဒ် တင်ပေးတာကို ကာဗာနီက အနိုင်ဂိုးအဖြစ် ခေါင်းတိုက်သွင်းယူခဲ့ပါတယ်။
