ဘာစီလိုနာအသင်း၏ စပိန်လူမျိုးနည်းပြ ဇာဗီဟာနန်ဒက်ဇ်က မိမိ၏ကစားသမားဘဝတွင် ဘာစီလိုနာအသင်းဖော်များဖြစ်ခဲ့သည့် ပီကေး၊ ဘူးစကွက်စ်နှင့် ယော်ဒီအယ်လ်ဘာတို့ အသင်းမှထွက်ခွာသွားခဲ့ခြင်းအတွက် အိပ်ပျော်ရန် ခက်ခဲခဲ့ပြီး နာကျင်ဝမ်းနည်းရကြောင်းပြောကြားခဲ့သည်။
သွေးသစ်လောင်းပြန်လည်တည်ဆောက်မှုများပြုလုပ်နေသည့် ဘာစီလိုနာအသင်းသည် ပြီးခဲ့သည့် ရက်ပိုင်းအတွင်းက ဝါရင့်နောက်ခံလူ အယ်လ်ဘာ (၃၄ နှစ်)အား နှစ်ဦးသဘော တူစာချုပ်ဖျက်သိမ်းခဲ့သလို၊ အသင်းနှင့်စာချုပ်သက်တမ်းကုန်ဆုံးခဲ့သည့် ဝါရင့်ကွင်းလယ်လူ ဘူးစကွက်စ် (၃၄ နှစ်)မှာလည်း ယခုရာသီကုန်တွင်အသင်းမှ ထွက်ခွာမည်သည်။
ထို့ပြင် ဇာဗီ၏အသင်းဖော်ဟောင်းဖြစ်ခဲ့သည့် ဝါရင့်နောက်ခံလူ ပီကေး (၃၆ နှစ်)မှာလည်း ပြီးခဲ့သည့် ၂၀၂၂ နိုဝင်ဘာလကတည်းက ကစားသမားဘဝမှ အနားယူသွားခဲ့ရာ လာမည့်ရာသီတွင် ဘာစီလိုနာအသင်း၌ Tiki Taka ခေတ်ကစားသမားအားလုံး တစ်ခန်းရပ်သွားခဲ့ပြီဖြစ်သည်။
ယင်းအခြေအနေနှင့်ပတ်သက်ပြီးဇာဗီက “တကယ်ကိုခက်ခဲတဲ့ ဆုံးဖြတ်ချက်တွေပါပဲ။ ဒီအကြောင်းအရာတွေကြောင့် ကျွန်တော့်အနေနဲ့ အိပ်ပျော်ဖို့ ခက်ခဲ့ပြီး နာကျင်ခဲ့ရပါတယ်” ဟု Marca သတင်းစာသို့ ဖြေကြားခဲ့သည်။
