အယ်လ်ဟီလယ်အသင်းသည် PSG အသင်းမှ ပြင်သစ်လက်ရွေးစင်အသင်းခေါင်းဆောင် ဘာပေကို ကမ္ဘာ့စံချိန်တင်ပြောင်းရွှေ့ကြေး ယူရို သန်း ၃၀၀ ဖြင့် ကမ်းလှမ်းထားသော်လည်း ကာယကံရှင်ဖြစ်သူမှာ ဆော်ဒီပရိုလိဂ်ပြိုင်ပွဲသို့ ပြောင်းရွှေ့ကစားလိုခြင်းမရှိကြောင်း မက်ဒရစ်အခြေစိုက် အားကစားဝက်ဘ်ဆိုက်ဖြစ်သည့် Relevo က ဖော်ပြခဲ့သည်။
ကမ္ဘာ့တန်ဖိုးအမြင့်ဆုံးအဖြစ် ၂၀၁၇ ခုနှစ်ကတည်းက စံချိန်တင်ထားသော နေမာ၏ ဘာစီလိုနာမှ PSG အသင်းသို့ ပြောင်းရွှေ့ခဲ့စဉ်က ယူရို ၂၂၂ သန်းကို ကျော်ဖြတ်ကာ စံချိန်သစ်တင်နိုင်မည်ဖြစ်သည်။ အယ်လ်ဟီလယ်အသင်းသည် ယင်းကဲ့သို့ စံချိန်တင်ပြောင်းရွှေ့ကြေး သုံးစွဲမည့်အပြင် ဘာပေကိုလည်း အလွန်မြင့်မားသည့် လစာနှုန်းထားအဖြစ် တစ်နှစ် ယူရိုသန်း ၇၀၀ အထိ ပေးသွားမည်ဟု ကမ်းလှမ်းခဲ့ကြောင်း မီဒီယာများစွာက ဖော်ပြခဲ့သည်။
အပြောင်းအရွှေ့ကျွမ်းကျင်သူ အီတလီ အားကစားဂျာနယ်လစ် ဖာဘရီဇီယိုရိုမာနိုကမူ အယ်လ်ဟီလယ်အသင်း ၏ကမ်းလှမ်းမှုမှာ အသားတင်လစာ ယူရိုသန်း ၂၀၀ သာဖြစ်ပြီး ပုံရိပ် အသုံးပြုခအပါအဝင် အခြားဝင်ငွေများကို ထည့်တွက်မှသာ ယူရိုသန်း ၇၀၀ ရှိမည်ဖြစ်ကြောင်း ဆိုခဲ့သည်။
အယ်လ်ဟီလယ်အသင်းသည် ဘာပေကို အလွန်မြင့်မားသည့် လစာနှုန်းထားဖြင့် ကမ်းလှမ်းလိုက်သည့်အပြင် လာမည့်နွေရာသီတွင် ရီးယဲလ်အသင်းသို့ ပြောင်းရွှေ့လိုပါက ပြောင်းရွှေ့ကြေးအလွတ်ဖြင့် ထွက်ခွာခွင့်ပြုမည့်အချက်လည်း ပါဝင် ကြောင်း သိရသည်။ ဘာပေသည် PSG အသင်းနှင့် ၂၀၂၄ ခုနှစ်တွင် စာချုပ်သက်တမ်း ကုန်ဆုံးမည်ဖြစ်ပြီး ကစားသမားဘက်မှ စာချုပ်သစ် ချုပ်ဆိုလိုခြင်းမရှိသည်မှာ သေချာနေသောကြောင့် အသင်းမှ ယခုနွေ ရာသီတွင် ရောင်းချသွားရန် ဆုံးဖြတ်ထားသည်။
Relevo ၏သတင်း တွင် ဘာပေသည် ပြင်သစ်ချန်ပီယံအသင်းနှင့်သာ စာချုပ်သက်တမ်းကုန်ဆုံးသည်အထိ ဆက်နေလိုပြီး လာမည့်နှစ်နွေရာသီတွင် ရီးယဲလ်မက်ဒရစ်သို့ ပြောင်းရွှေ့ကြေးအလွတ်ဖြင့် ထွက်ခွာရန် ဆုံးဖြတ်ထားပြီးဖြစ်ကြောင်း ရေးသားခဲ့သည်။
ဘာပေသည် သူ၏အနာဂတ် အပြောင်းအရွှေ့သတင်းများနှင့် ပတ်သက်ပြီး တစ်စုံတစ်ရာ မှတ်ချက်ပေးခြင်း မရှိသော်လည်း NBA နာမည်ကြီး ကစားသမား အန်တက်ကွန်ပို အရွှန်းဖောက်သည့် Post ကိုမူ တုံ့ပြန်ခဲ့ကြောင်း သိရသည်။ အန်တက်ကွန်ပိုက သူ၏ Twitter တွင် “အယ်လ်ဟီလယ်အနေနဲ့ ကျွန်တော့်ကို ခေါ်ယူနိုင်ပါတယ်။ ကျွန်တော် လည်း ကိုင်လီယန်ဘာပေလိုပါပဲ” ဟု အရွှန်းဖောက်ရေးသားခဲ့သည်။
ဘာပေသည် ဂရိဘက်စကတ်ဘောသမား အန်တက်ကွန်ပို၏ Post ကို သူ၏ Twitter တွင် ရယ်မောနေသည့် Emoji များဖြင့် ပြန် Share ခဲ့ကြောင်း သိရသည်။
