အသက်-၄၀ ပြည့်မွေးနေ့ပွဲကိုကျင်းပပြီးနောက် ရက်အနည်းငယ်အကြာမှာပဲ ဘောလုံးလောကကြယ်ပွင့် ခရစ္စတီယာနိုရော်နယ်ဒိုဟာ လက်ရှိကစားနေတဲ့ ဆော်ဒီပရိုလိဂ်ကလပ် အယ်လ်နာဆာနဲ့ နောက်ထပ် ၁ နှစ်စာချုပ်သက်တမ်း တိုးမြှင့်ဖို့ သဘောတူညီလိုက်ပြီလို့သိရပါတယ်။ ၂၀၂၃ ဇန်နဝါရီမှာ အယ်လ်နာဆာသို့ ၂ နှစ်ခွဲစာချုပ်နဲ့ ပြောင်းရွှေ့လာခဲ့တဲ့ ရော်နယ်ဒိုဟာ အသင်းနဲ့ ယခုလက်ရှိ ၂၀၂၄-၂၅ ရာသီကုန်မှာပဲ စာချုပ်သက်တမ်းကုန်ဆုံးမှာဖြစ်ပေမယ့် နောက်ထပ် ၁ နှစ်ထပ်မံသက်တမ်းတိုးခဲ့တာကြောင့် ၂၀၂၆ ခုနှစ်၊ ဇွန်လအထိ ဆော်ဒီမြေမှာ ဆက်လက်နေထိုင်သွားတော့မှာဖြစ်ပါတယ်။
ဆော်ဒီအာရေဗျအခြေစိုက် AFP သတင်းဌာနက “ရော်နယ်ဒိုကို စာချုပ်သက်တမ်းတိုးဖို့ ကလပ်ဘက်ကရော ကစားသမားဘက်ကပါ သဘောတူညီမှုရရှိထားပါတယ်။ ဒါပေမယ့် လက်မှတ်ရေးထိုးတာမျိုးတော့ မလုပ်ရသေးပါဘူး။ လာမယ့်ရက်အနည်းငယ်မှာပဲ အယ်လ်နာဆာက ကြေညာချက်တစ်ခု ထုတ်ပြန်ပါလိမ့်မယ်” လို့ဖော်ပြထားခဲ့ပါတယ်။
အသက်-၄၀ ပြည့်ပြီး ၁ ပတ်အတွင်းမှာပဲ အယ်လ်နာဆာဟာ ပေါ်တူဂီအသင်းခေါင်းဆောင်ကို စာချုပ်သက်တမ်းတိုးမြှင့်ဖို့ ဆုံးဖြတ်ခဲ့တာဖြစ်ပါတယ်။ မန်ချက်စတာယူနိုက်တက်နဲ့ ရီးရဲလ်မက်ဒရစ်ကြယ်ပွင့်ဟောင်းဟာ ထိပ်တန်းဂိုးသွင်းစွမ်းရည်ကို ဆက်လက်ထိန်းသိမ်းထားနိုင်ဆဲဖြစ်ပြီး ပြီးခဲ့တဲ့ ဖေဖော်ဝါရီ ၆ ရက်နေ့က အယ်လ်ဖီဟာကို ၃-၀ နဲ့အနိုင်ရခဲ့တဲ့ ဆော်ဒီပရိုလိဂ်ပွဲစဉ်မှာလည်း အယ်လ်နာဆာအတွက် သွင်းဂိုး ၁ ဂိုးရယူပေးနိုင်ခဲ့ပါတယ်။ လာမယ့်သောကြာနေ့မှာတော့ အယ်လ်နာဆာဟာ ဆော်ဒီပရိုလိဂ်ပွဲစဉ်အဖြစ် အယ်လ်အာလီကို အဝေးကွင်းမှာ သွားရောက်ရင်ဆိုင်ရပါမယ်။
