မန်ယူနည်းပြ အဲရစ်တန်ဟက်ဂ်က လာမည့်သီတင်းပတ် အပြောင်းအရွှေ့နောက်ဆုံးရက်မတိုင်မီ ၎င်း၏အသင်းနှင့်ပတ်သက်သည့် သတင်းအချက်အလက်များ ပေးလိုက်ပြီဖြစ်သည်။
ဖာကန်ဒို ပယ်လစ်စထရီအား မန်ယူမှ အငှားနှင့်ထွက်ခွာခွင့်မပြုပေမဲ့ ဘရန်ဒန်ဝီလျံကမူ ယခုလာမည့် ၃၁ ရက်နေ့၏ အပြောင်းအရွှေ့နောက်ဆုံးချိန် မတိုင်ခင် ထွက်ခွာသွားနိုင်ကြောင်း သိရသည်။
ပယ်လစ်စထရီသည် ယခုလအစောပိုင်းက ချာလ်တန်ကိုအနိုင်ရရှိခဲ့သော လိဂ်ဖလားကွာတားဖိုင်နယ်တွင် နှစ်နှစ်ကျော်စောင့်ဆိုင်းခဲ့ရပြီးနောက် ၎င်း၏မန်ယူအသင်းအတွက် ပွဲဦးထွက်ကစားပေးခဲ့ပြီး ယခုလ ၂၅ ရက်နေ့တွင် နော်တင်ဟမ်ဖောရက်စ်နှင့်ကန်ခဲ့သော ဆီမီးဖိုင်နယ်ပထမအကျော့အောင်ပွဲ၏ဒုတိယပိုင်း၌ ပေါ်ထွက်လာခဲ့သည်။
သူသည် ဆောင်းရာသီအပြောင်းအရွှေ့ကာလတွင် ထွက်ခွာရန် နီးကပ်နေပြီဟု အသက် ၂၁ နှစ်ရှိ ပယ်လစ်စထရီက အပြောင်းအရွှေ့ကာလမတိုင်ခင် အရိပ်အမြွက် ပြောကြားခဲ့သော်လည်း တန်ဟက်ဂ်က ပယ်လစ်စထရီသည် ရာသီကုန်အထိ မန်ယူတွင် ဆက်ရှိနေမည်ဖြစ်ကြောင်း ရှင်းလင်းပြောကြားလိုက်ပြီဖြစ်သည်။
“ဗုဒ္ဓဟူးနေ့ (၂၅ ရက်) တုန်းက ကျွန်တော်တို့ သူ့ကို ထည့်သုံးခဲ့တဲ့ပုံစံက အချက်ပြလိုက်တာပါပဲ”
“ဒါက နည်းနည်းတော့ သူ့အပေါ်မှာ မူတည်ပါတယ်။ ကျွန်တော် သူ့ကို သဘောကျတယ် ဒါပေမယ့် ကျွန်တော်တို့လည်း သူ့ရဲ့ ဖွံ့ဖြိုးတိုးတက်မှု ဘယ်ကို သွားမလဲဆိုတာကို ကြည့်ရပါမယ်။ သူ့အတွက် အခွင့်အရေးနဲ့ ထိုက်တန်တဲ့ အခိုက်အတန့်ကို ရှာဖွေဖို့လည်း သူ့အကြောင်းပါပဲ။
“ဒါပေမဲ့လည်း သူက အငှားချခံရချင်တဲ့အခါ အဲဒီအတွက် ကျွန်တော်တို့ ဆွေးနွေးရမှာပါ”
“ကျွန်တော်တို့မှာ အိုင်ဒီယာတွေရှိပါတယ်၊ တချို့ကစားသမားတွေအတွက် ကျွန်တော်တို့က အငှားဖွင့်ထားပေမဲ့ တချို့ကစားသမားတွေအတွက်တော့ မဖွင့်ထားပါဘူး။ သူတို့က ပထမတန်းစား၊ အစွမ်းအစရှိသူတွေဖြစ်တဲ့အတွက် သူတို့ ကျွန်တော်တို့ရဲ့ ပတ်ဝန်းကျင်မှာ ပထမဦးစွာ ဖွံ့ဖြိုးတိုးတက်ဖို့ လိုအပ်တယ်။ ဒုတိယအနေနဲ့ ကျွန်တော်တို့မှာ ပွဲတွေအများကြီးရှိပါတယ်။ အဲဒါတွေကို ကာမိစေဖို့ ကစားသမားတွေ လိုအပ်ပါတယ်။ ၁၀ ရက်အတွင်း ပွဲ ၃၀ ကို ကစားတဲ့အခါ ကစားသမားများစွာ လိုအပ်ပါတယ်။” ဟု တန်ဟက်ဂ်က ပြောကြားခဲ့သည်။
အသက် ၂၂ နှစ်ရှိ နောက်ခံလူ ဝီလျံသည် ပြီးခဲ့သည့်ရာသီက နော်ဝစ်ချ်တွင် အငှားသွားရောက်ကစားပြီးနောက် ၂၀၂၁ ခုနှစ် မေလကတည်းက မန်ယူတွင် တစ်ကြိမ်ကစားခဲ့ပြီး ဒဏ်ရာကြောင့် ယခုရာသီပထမသုံးလကို လွဲချော်ခဲ့သည်။
အာရွန်ဝမ် ဘစ်ဆာကာသည် ညာနောက်တန်းတွင် ဒီယိုဂို ဒါးလော့အတွက် ပြိုင်ဘက်အဖြစ် ပေါ်ထွက်ခဲ့ပြီး တန်ဟက်ဂ်တွင် ဘယ်နောက်တန်းမှ ရွေးချယ်ရန် လုခ်ရှောနှင့် တိုင်ရယ် မလာစီယာတို့ ရှိသည်။ ဝီလျံသည် နောက်တစ်ကြိမ် အငှားချခံရရန် စိတ်အားထက်သန်နေသည်ဟု နားလည်ထားပါသည်။
အသက် ၁၉ နှစ်ရှိ ကွင်းလယ်ကစားသမား ဇီဒန်းသည် ပထမဦးစားပေး ၁၁ ယောက်တွင် တစ်ရာသီလုံး တစ်ပွဲမျှ မကစားခဲ့ရသည့်နောက် ပထမဆုံးအငှားဖြင့် ပြောင်းရွှေ့ရန် စိတ်အားထက်သန်နေသည်။
“ဒါက ဇီဒန်းအတွက်ပါ ထည့်တွက်ပါတယ်၊ ဘရန်ဒန်အတွက်လည်း သေချာပါတယ်” ဟု တန်ဟက်ဂ်က အငှားဖြင့် ထွက်ခွာရန် ဖြစ်နိုင် ခြေကို ထည့်သွင်းပြောကြားခဲ့သည်။
ယခုဇန်နဝါရီလ အပြောင်းအရွှေ့ကာလသည် ဒေသစံတော်ချိန် ၃၁ ရက် ည ၁၁ နာရီတွင် ပိတ်ပါသည်။