အာဆင်နယ်အသင်းသည် တနင်္ဂနွေနေ့က ယှဉ်ပြိုင်ကစားခဲ့သည့် ပရီးမီးယားလိဂ်ပွဲစဉ်တွင် ဖူလ်ဟမ်အသင်းကို အဝေးကွင်း၌ (၃-ဝ)ဂိုးဖြင့် အနိုင်ရရှိခဲ့သည့်အတွက် လန်ဒန်ဒါဘီအဝေးကွင်း(၅)ပွဲဆက် ပေးဂိုးမဲ့ရလဒ်များဖြင့် အနိုင်ရရှိသည့် ပထမဆုံးအသင်းအဖြစ် မှတ်တမ်းဝင်သွားခဲ့ကြောင်း သိရသည်။
ယခုရာသီ ပရီးမီးယားလိဂ်ပြိုင်ပွဲ၌ လန်ဒန်အခြေစိုက် ကလပ်အသင်း(၇)သင်း ယှဉ်ပြိုင်လျက်ရှိရာ အာဆင်နယ်အသင်းသည် ဝက်စ်ဟမ်းမှလွဲ၍ ကျန်(၅)သင်းနှင့် အဝေးကွင်းတွင် ဆုံတွေ့ပြီးခဲ့ပြီဖြစ်သည်။
အာဆင်နယ်အသင်းသည် အဆိုပါ(၅)သင်းစလုံးကို အဝေးကွင်း၌ ပေးဂိုးမဲ့ Clean Sheet ရလဒ်များဖြင့် အနိုင်ရရှိခဲ့ခြင်းဖြစ်ပြီး ယင်းသို့ စွမ်းဆောင်နိုင်ခြင်းမှာ ပရီးမီးယားလိဂ်တွင်သာမက အင်္ဂလိပ်ဘောလုံးသမိုင်း၌ပင် ပထမဆုံးအဖြစ် မှတ်တမ်းဝင်ခဲ့ခြင်းဖြစ်သည်။
အာဆင်နယ်အသင်းသည် ခရစ္စတယ်ပဲလေ့စ်ကို (၂-ဝ)ဂိုး၊ ဘရန့်ဖို့ဒ်ကို (၃-ဝ)ဂိုး၊ ချယ်လ်ဆီးကို (၁-ဝ)ဂိုး၊ စပါးကို (၂-ဝ)ဂိုး၊ ဖူလ်ဟမ်ကို (၃-ဝ)ဂိုးတို့ဖြင့် အနိုင်ရခဲ့ခြင်းဖြစ်ပြီး ဧပြီ(၁၆)ရက်၌ ဝက်စ်ဟမ်းအသင်းနှင့်ပွဲတွင် ယခုမှတ်တမ်းကို ဆက်ထိန်းနိုင်ပါက လန်ဒန်ဒါဘီပြိုင်ဘက်အားလုံးကို အဝေးကွင်း၌ ပေးဂိုးမဲ့အနိုင်ရရှိသည့် ပထမဆုံးအသင်းအဖြစ်လည်း ထပ်မံမှတ်တမ်းဝင်မည်ဖြစ်သည်။
အာဆင်နယ်အသင်းသည် ယခုရာသီ ပရီးမီးယားလိဂ်ပြိုင်ပွဲတွင် အကောင်းဆုံး အဝေးကွင်းရလဒ်ပိုင်းကို ပိုင်ဆိုင်ထားပြီး (၁၄)ပွဲကစားအပြီး၌ (၁၁)ပွဲနိုင်၊ (၁)ပွဲသရေကျကာ (၂)ပွဲသာ ရှုံးနိမ့်ခဲ့ခြင်းကြောင့် အမှတ်ပေးဇယားထိပ်ဆုံး၌ (၅)မှတ်ဖြတ် ဦးဆောင်နေနိုင်ခြင်းလည်း ဖြစ်သည်။
ထို့ပြင် ဖူလ်ဟမ်နှင့်ပွဲမှာ အာဆင်နယ်အသင်းအနေဖြင့် နည်းပြ အာတီတာ၏လက်အောက်တွင် နိုင်ပွဲ(၁၀၀)ပြည့် မြောက်သည့်ပွဲအဖြစ်လည်း မှတ်တမ်းဝင်ခဲ့သည်။
အာတီတာသည် အာဆင်နယ်အသင်းကို ၂၀၁၉ ခုနှစ်၊ ဒီဇင်ဘာ (၂၂)တွင် စတင်တာဝန်ယူခဲ့ပြီး စုစုပေါင်း(၁၆၇)ပွဲ ကိုင်တွယ် ပြီးချိန်တွင် နိုင်ပွဲ(၁၀၀)ပြည့်မြောက်ခဲ့ခြင်းဖြစ်ကြောင်း သိရသည်။
အာတီတာသည် ယခုရာသီတွင် ပရီးမီးယားလိဂ်တစ်လတာအကောင်းဆုံးနည်းပြဆုကို (၃)ကြိမ်ရရှိထားပြီး အာဆင်နယ်နည်းပြများထဲ၌ ယင်းသို့ စွမ်းဆောင်နိုင်သည်မှာ ပထမဆုံးဖြစ်ကြောင်းလည်း သိရသည်။
