ဂျာမနီအသင်း၏ ကွင်းလယ်တိုက်စစ်ကစားသမား ဟာဗက်ဇ်က ဝင်ဘလေကွင်းတွင် ယှဉ်ပြိုင်ကစားရမည့် အင်္ဂလန် – ဂျာမနီပွဲမှာ မိမိအတွက် အလွန်ထူးခြားသည့်ပွဲဖြစ်သည်ဟု ပြောကြားခဲ့သည်။
ဟာဗက်ဇ်က မိမိမှာ ချယ်လ်ဆီးအသင်းနှင့်အတူ အင်္ဂလန်မြေတွင် ကစားနေသူဖြစ်သောကြောင့် အလွန်ထူးခြားသည့်ပွဲ ဖြစ်သည်ဟု ဆိုခဲ့ခြင်းလည်းဖြစ်သည်။
ထို့ပြင် ဟာဗက်ဇ်က ” ဒီပွဲက ပရိသတ်တွေအတွက်ရော အသင်းအတွက်ပါ ထူးခြားတဲ့ ပွဲကြီးပွဲကောင်းလည်း ဖြစ်ပါတယ်။ ဒီပွဲမှာ အနိုင်ရဖို့အတွက် အရာအားလုံးလုပ်ဆောင်သွားမှာပါ”ဟု ပြောကြားခဲ့သည်။
ဟာဗက်ဇ်သည် ဂျာမနီအသင်းလူစာရင်းတွင် ပါဝင်နေသည့် ချယ်လ်ဆီးကစားသမား(၃)ဦးအနက် တစ်ဦးဖြစ်ပြီး အခြားကစားသမားများမှာ ဗာနာနှင့် ရူဒီဂါတို့ဖြစ်သည်။
ဂျာမနီအသင်းတွင် အင်္ဂလန်၌ကစားနေသူ (၆)ဦးပါဝင်နေပြီး အခြားအသင်းမှ ကစားသမားများမှာ ဂွန်ဒိုဂန်(မန်စီးတီး)၊ ခို့ချ်(လိဒ်စ်)နှင့် လေနို(အာဆင်နယ်)တို့ဖြစ်ကြောင်း သိရသည်။
ပယ်နယ်တီအဆုံးအဖြတ်အထိ ရောက်ရှိနိုင်ခြေရှိ၊ မရှိနှင့်ပတ်သက်ပြီး ဟာဗက်ဇ်က ယခုကဲ့သို့ မှတ်ချက်ပြုခဲ့သည်။
” တကယ်တော့ ကျွန်တော်တို့ ပြင်ဆင်ထားပြီးသားပါ။ လေ့ကျင့်ရေးပြီးတဲ့အချိန်မှာ ကျွန်တော်တို့ ပယ်နယ်တီ တစ်ကြိမ် သို့မဟုတ် နှစ်ကြိမ်လောက်တော့ ကန်ပါတယ်။ ဒါပေမဲ့ အဲဒီမတိုင်မီ မိနစ် ၁၂၀ က ပိုအရေးကြီးပါတယ်။ ပယ်နယ်တီမတိုင်မီ အနိုင်ရဖို့ ကျွန်တော်တို့ ကြိုးစားပါလိမ့်မယ်။ ပယ်နယ်တီကန်ရရင်လည်း ကျွန်တော် သေချာပေါက် ကန်သွင်းမှုပါ”ဟု ဟာဗက်ဇ်က ပြောကြားခဲ့သည်။
ဂျာမနီအသင်းသည် ယူရို-၉၆ ပြိုင်ပွဲ ဆီမီးဖိုင်နယ်တွင် အင်္ဂလန်နှင့်ဆုံတွေ့ခဲ့ကာ ပယ်နယ်တီနှင့်အနိုင်ရသည့် သာဓကများလည်းရှိပြီး ယင်းပွဲ၌ လက်ရှိအင်္ဂလန်အသင်းနည်းပြ ဆောက်ဂိတ်က ပယ်နယ်တီလွဲချော်ခဲ့သည်။
