ယူရို-၂၀၂၄ ခြေစစ်ပွဲများအတွက် ရွေးချယ်ထားသော အင်္ဂလန်လက်ရွေးစင်အသင်းလူစာရင်းမှ မန်ယူတိုက်စစ်ကစားသမား ရပ်ရှ်ဖို့ဒ်နှင့် ချယ်လ်ဆီးကွင်းလယ်ကစားသမား မေဆန်မောင့်တို့ တနင်္လာနေ့က ထပ်မံနုတ်ထွက်ခဲ့ကြောင်း သိရသည်။
အင်္ဂလန်အသင်းသည် ယူရို-၂၀၂၄ ခြေစစ်ပွဲအဖြစ် မတ်(၂၃)တွင် အီတလီ၊ မတ်(၂၆) တွင် ယူကရိန်းတို့နှင့် ယှဉ်ပြိုင်ကစားရမည်ဖြစ်ပြီး ယင်းအတွက် ကစားသမား(၂၅)ဦးစာရင်းကို ပြီးခဲ့သည့်ကြာသပတေးနေ့တွင် နည်းပြ ဆောက်ဂိတ်က ရွေးချယ်ထုတ်ပြန်ခဲ့သည်။
သို့သော် ပြီးခဲ့သည့် တနင်္ဂနွေနေ့မှာပင် နယူးကာဆယ်ဂိုးသမား နစ်ပုပ်က ဒဏ်ရာအကြောင်းပြချက်ဖြင့် နုတ်ထွက်သွားခဲ့ပြီး ၎င်းနေရာတွင် စပါးအသင်းမှ ဂိုးသမား ဖရေဆာဖော်စတာကို အစားထိုးရွေးချယ်ခဲ့သည်။
ထို့နောက် တနင်္လာနေ့တွင် ရပ်ရှ်ဖို့ဒ်နှင့် မေဆန်မောင့်တို့ ထပ်မံနုတ်ထွက်ခဲ့ခြင်းဖြစ်သည်။
ရပ်ရှ်ဖို့ဒ်သည် ဖူလ်ဟမ်နှင့် ယှဉ်ပြိုင်ကစားခဲ့သည့် FA ဖလားပွဲတွင် ဒဏ်ရာအနည်းငယ်ရရှိခဲ့ခြင်းကြောင့်ဖြစ်ပြီး မေဆန်မောင့်မှာမူ ပြီးခဲ့သည့် ဖေဖော်ဝါရီလကတည်းက ဆီးခုံရိုးဒဏ်ရာ ရရှိနေခြင်းဖြစ်ကြောင်း သိရသည်။
အင်္ဂလန်နည်းပြ ဆောက်ဂိတ်သည် ရပ်ရှ်ဖို့ဒ်နှင့် မေဆန်မောင့်တို့နေရာကိုမူ အစားထိုးခေါ်ယူမှုပြုလုပ်တော့မည်မဟုတ်ဘဲ လာမည့် ယူရိုခြေစစ်ပွဲနှစ်ပွဲကို ကစားသမား(၂၃)ဦးဖြင့်သာ ယှဉ်ပြိုင်ကစားသွားမည်ဟု သိရသည်။
