အင်္ဂလန်လက်ရွေးစင်အသင်းဖော်များဖြစ်သည် ဟာရီကိန်းနှင့် ဒက်ကလန်ရိုက်စ်တို့ မန်ယူသို့ ရောက်လာစေလိုသည်ဟု လုခ်ရှော ပြောကြား

မန်ယူအသင်း၏ နောက်ခံလူ လုခ်ရှောက မန်ယူအသင်းသို့ အင်္ဂလန်လက်ရွေးစင်အသင်းဖော်များဖြစ်သည့် တိုက်စစ်မှူး ဟာရီကိန်းနှင့် ကွင်းလယ်ကစားသမား ဒက်ကလန်ရိုက်စ်တို့ ရောက်လာစေလိုကြောင်း ပြောကြားခဲ့သည်။

မန်ယူအသင်းသည် ယခုနွေရာသီတွင် ထိပ်တန်းကစားသမားများ ခေါ်ယူအားဖြည့်ရန် စီစဉ်နေရာ ဟာရီကိန်းနှင့် ဒက်ကလန်ရိုက်စ်တို့မှာ ပစ်မှတ်ကစားသမားစာရင်းတွင် ပါဝင်နေသည်။ သို့သော် ယင်းကစားသမားနှစ်ဦးမှာ ခေါ်ယူလိုသည့်အသင်းများ များ ပြားနေသည့်အပြင် ပြောင်းရွှေ့ကြေးတန်ဖိုးမှာလည်း မြင့်မားသည့်အတွက် မန်ယူအသင်းအနေဖြင့် ခေါ်ယူနိုင်ရန် မလွယ်ကူသည့်အခြေအနေရှိနေသည်။ 

နောက်ဆုံးထွက်ပေါ်နေသည့် သတင်းများအရ ဒက်ကလန်ရိုက်စ်ကို အာဆင်နယ်အသင်းက ပေါင်သန်း (၁၀၀)ဖြင့် ကမ်းလှမ်းရန် စီစဉ်နေသလို၊ ဟာရီကိန်းကိုလည်း PSG အသင်း ဥက္ကဋ္ဌ အယ်လ်ခီလိုင်ဖီက နွေရာသီ၏ နံပါတ်(၁)ပစ်မှတ်အဖြစ် သတ်မှတ်ထားနေကြောင်း သိရသည်။ 

အယ်လ်ခီလိုင်ဖီသည် လက်ရှိနည်းပြ ဂယ်လ်ချီ၏နေရာ၌ နည်းပြသစ် အစားထိုးခန့်အပ်ရန် စီစဉ်လျက်ရှိပြီး အဆိုပါနည်းပြသစ်အား ဟာရီကိန်းကို ခေါ်ယူရန် တိုက်တွန်းသွားလိမ့်မည်ဟုလည်း Le Parisien သတင်းစာက ဖော်ပြခဲ့သည်။

သို့သော် လုခ်ရှောက ယင်းကစားသမားများ မန်ယူအသင်းသို့ ရောက်ရှိလာရန် မျှော်လင့်နေပြီး “သူတို့နဲ့ စကားပြောတဲ့အခါ မန်ချက်စတာက ဘယ်လိုကောင်းကြောင်း ကျွန်တော် ပြောပြလေ့ရှိပါတယ်။ ဘာကြောင့်လဲဆိုတော့ သူတို့ရဲ့ အရည်အသွေးကို ကျွန်တော် သိထားတာကြောင့်ပါ။ သူတို့က ကမ္ဘာ့အဆင့်ကစားသမားတွေပါ။ သူတို့က ကျွန်တော်တို့အသင်းကို အကူအညီအများကြီး ပေးနိုင်မယ့်သူတွေပါ။ သူတို့ကို မန်ယူအသင်းကို ရောက်လာစေချင်ပါတယ်။ ဒါပေမဲ့ ကျွန်တော် ဒီလောက်ပဲ ပြောနိုင်ပါတယ်”ဟု လုခ်ရှောက ပြောကြားခဲ့သည်။ 

ယင်းကစားသမားနှစ်ဦးစလုံးမှာ ယခုနွေရာသီတွင် လက်ရှိအသင်းများနှင့် လမ်းခွဲရန် နီးစပ်နေကြောင်းလည်း သိရသည်။