စပါးအသင်းနည်းပြ အန့်ပိုစတီကိုဂလူးက အင်္ဂလန်လက်ရွေးစင်အသင်းနည်းပြရာထူးကို စိတ်မဝင်စားဘဲ စပါးအသင်းအတွက်သာ အာရုံစိုက်ထားကြောင်း တုံ့ပြန်ပြောကြားခဲ့သည်။
အင်္ဂလန်အသင်းအား ရှစ်နှစ်ကြာကိုင်တွယ်ခဲ့သည့် ဂါရတ်ဆောက်ဂိတ်မှာ စာချုပ်သက်တမ်း ငါးလကျန်ရှိသော်လည်း ယူရို- ၂၀၂၄ ပြိုင်ပွဲအပြီးတွင် ရာထူးမှ နုတ်ထွက်သွားပြီဖြစ်သည်။
လစ်လပ်နေသည့် နည်းပြရာထူးအတွက် ရေပန်းစားသူများစာရင်းတွင် သြစတြေးလျလက်ရွေးစင်အသင်းအား ကိုင်တွယ်ဖူးသူ ပိုစတီကိုဂလူးမှာလည်း တစ်ဦးအပါအဝင်ဖြစ်သည်။
သို့သော် ပထမဆုံး ရာသီကြိုခြေစမ်းပွဲအဖြစ် ဇူလိုင် (၁၇) ရက်က စကော့တလန်ကလပ် ဟတ်စ်အသင်းအား (၅-၁) ဂိုးဖြင့် အနိုင်ရသည့်ပွဲအပြီးတွင် ပိုစတီကိုဂလူးက ”ကျွန်တော်က တော့တင်ဟမ်မန်နေဂျာဖြစ်ပြီး ရာသီကြိုကာလ စတင်နေပါပြီ။ ဒါကြောင့် စိတ်ထဲမှာ တခြား ဘာမှမရှိဘဲ ဒီအသင်းအတွက် အောင်မြင်မှု ယူဆောင်ပေးနိုင်ဖို့ပဲ ကြိုးစားနေပါတယ်။ တခြားဘာကိုမှ တွေးနေစရာအကြောင်းမရှိပါဘူး။ ဒီနေ့လယ်မှာ ကျွန်တော် တရေးအိပ်ခဲ့တယ်။ အဲဒါကြောင့် ဘာတွေဖြစ်နေလဲဆိုတာ ကျွန်တော် မသိပါဘူး။ သြစတြေးလျကို ကိုင်တွယ်ခဲ့တဲ့ အချိန်တွေကို ကျွန်တော် သဘောကျပါတယ်။ အဲဒီမှာ ကောင်းမွန်တဲ့ လေးနှစ်တာကာလ ရရှိခဲ့တယ်။ ကျွန်တော်တို့ အာရှဖလားမှာဗိုလ်စွဲပြီး ကမ္ဘာ့ဖလားအတွက် ခြေစစ်ပွဲအောင်မြင်ခဲ့တယ်။ ဒါပေမဲ့ အဲဒီအရာအားလုံးက အဆုံးသတ်ဆိုတာ အမြဲရှိပါတယ်။ ဒါက ကျွန်တော့်အတွက် သဘာဝကျတဲ့ အဆုံးသတ်တစ်ခုလို့ ထင်ပါတယ်။ လက်ရွေးစင်အသင်းနည်းပြဘဝကို ကျွန်တော် သဘောကျပါတယ်။ အနာဂတ်မှာ ဘာဖြစ်မလဲဆိုတာ ဘယ်သူ သိမှာလဲ။ လွန်ခဲ့တဲ့ ငါးနှစ်က ကျွန်တော် ဂျပန်မှာရှိနေခဲ့ပြီး အခုတော့ ပရီးမီးယားလိဂ်မှာ ရှိနေပါပြီ” ဟု တုံ့ပြန်ပြောကြားခဲ့သည်။
