အင်္ဂလန်တွင် ပြီးခဲ့သည့်ရက်ပိုင်းအတွင်း ကိုရိုနာဗိုင်းရပ်စ်ရောဂါပိုး ဗီဇအသွင်ပြောင်းလဲလာသည်ဆိုသည့် သုံးသပ်ချက်များ ထွက်ပေါ်လာခဲ့ရာ ပရီးမီးယားလိဂ်တာဝန်ရှိသူများသည် ကလပ်အသင်းများကို ရောဂါပိုး စစ်ဆေးမှုတိုးမြှင့်ရန် စီစဉ်နေပြီဖြစ်ကြောင်း သိရှိရသည်။
ယခုရာသီတွင် ပရီးမီးယားလိဂ်ကလပ်အသင်းများမှ ကစားသမား၊ နည်းပြအဖွဲ့နှင့် တာဝန်ရှိသူများကို ရောဂါပိုးစစ်ဆေးမှု တစ်ပတ်တစ်ကြိမ်သာ ပြုလုပ်နေသော်လည်း ယခုအခါ Tier 4 ဧရိယာရှိ ကလပ်အသင်းများကို တစ်ပတ် (၂)ကြိမ် တိုးမြှင့်စစ်ဆေးသွားမည်ဖြစ်ကြောင်း သိရှိရသည်။
အင်္ဂလန်တွင် ဒေသဧရိယာအလိုက် ခွဲခြားသတ်မှတ်မှုအရ Tier 1 ဧရိယာမှာ အန္တရာယ်အနည်းဆုံးဖြစ်ပြီး၊ Tier 4ဧရိယာမှာ အန္တရာယ်များ၍ ကွင်းအတွင်း၌ပရိသတ်များ ပွဲကြည့်ခွင့်ပင် မပေးသော ဧရိယာဖြစ်သည်။
ပရီးမီးယားလိဂ်အသင်းများထဲ၌ လန်ဒန်အခြေစိုက်ကလပ်အသင်းများဖြစ်သော အာဆင်နယ်၊ ချယ်လ်ဆီး၊ ဖူလ်ဟမ်၊ ခရစ္စတယ်ပဲလေ့စ်၊ စပါး၊ ဝက်စ်ဟမ်းအသင်းတို့မှာ Tier 4 ဧရိယာအတွင်း ပါဝင်နေသဖြင့် တစ်ပတ်လျှင် (၂)ကြိမ် ဆေးစစ်မှုခံယူရမည်ဖြစ်ကြောင်း သိရှိရသည်။
