အင်္ဂလန်ဘောလုံးအဖွဲ့ချုပ် (FA) တာဝန်ရှိသူများသည် ယခုအင်္ဂါနေ့တွင်ကစားမည့် ယူရို-၂၀၂၀ ရှုံးထွက် (၁၆)သင်းအဆင့်ပွဲစဉ် အင်္ဂလန်-ဂျာမနီပွဲမတိုင်မီ ဝင်ဘလေကွင်းအတွင်း အလွန်ကျယ်လောင်သည့် သီချင်းဖွင့်ရန် စီစဉ်နေကြောင်းသိရှိရသည်။
ယင်းပွဲမတိုင်မီ လူမျိုးရေးခွဲခြားမှုဆန့်ကျင်ရေးအထိမ်းအမှတ်အဖြစ် ကစားသမားများက ဒူးတစ်ဖက်ထောက်ရာတွင် (Black Lives Matter အပြုအမူပြုလုပ်ရာတွင်) ယင်းကျယ်လောင်သည့်သီချင်းကိုဖွင့်ရန် FAတာဝန်ရှိသူများက ဝင်ဘလေကွင်း တာဝန်ရှိသူများနှင့် တိုင်ပင်နေခြင်းဖြစ်သည်။
အင်္ဂလန်လက်ရွေးစင်အသင်းသည် ယူရိုပြိုင်ပွဲတွင် ပွဲမကစားမီ Black Lives Matter အပြုအမူကို ပြုလုပ်လျက်ရှိနေပြီးယင်းအပြုအမူမှာ အင်္ဂလန်အသင်းအားပေးသူပရိသတ်အချို့၏ ဆန့်ကျင်ကန့်ကွက်မှုများကို ရင်ဆိုင်နေရသည်။
Black Lives Matter အပြုအမူမှာ ခွဲဲခြားမှုဆန့်ကျင်ရေးသင်္ကေတတစ်ခုဖြစ်သော်လည်း ယင်းအပြုအမူ၏နောက်ကွယ်တွင် နိုင်ငံရေးသဘောတရားများနှင့် အခြားသော လူမျိုးရေးဆိုင်ရာသဘောတရားများ ပါဝင်နေ၍ အချို့သောပရိသတ်များက ယင်းအပြုအမူပြုလုပ်ခြင်းအား အလိုမရှိဘဲ ဆန့်ကျင်ကန့်ကွက်လျက်ရှိနေကြသည်။
ယူရို-၂၀၂၀ ပြိုင်ပွဲမတိုင်မီ အိမ် ကွင်းတွင်ကစားခဲ့သော အင်္ဂလန်အသင်း၏ ခြေစမ်းပွဲများ ၌လည်း ပွဲကြည့်စင်ပေါ်မှ ပရိသတ်အချို့၏ လှောင်ပြောင် အော်ဟစ်မှုများ ရှိခဲ့သည်။
အချို့သောပရိသတ်များက အင်္ဂလန်အသင်းအနေဖြင့် ယင်းအပြုအမူအား ဆက်လက်မပြုလုပ်ရန် တိုက်တွန်းလျက်ရှိနေသော်လည်း အင်္ဂလန်လက်ရွေးစင်အသင်းနည်းပြ ဆောက်ဂိတ်က ယူရို-၂၀၂၀ ပြိုင်ပွဲတွင် အင်္ဂလန်ကစားသမားများအနေဖြင့် ယင်းအပြုအမူအား ဆက်လက်ပြုလုပ်သွားမည်ဖြစ်ကြောင်း အတည်ပြုခဲ့သလို၊ အင်္ဂလန်အသင်း၏ ပွဲစဉ်များတွင်လည်း (ပွဲမစမီ)ကစားသမားများက ယင်းအပြုအမူအား ဆက်လက်ပြုလုပ်လျက်ရှိ နေဆဲဖြစ်သည်။
သို့ဖြစ်ရာ ဝင်ဘလေကွင်း၌ကစားမည့် အင်္ဂလန် – ဂျာမနီပွဲမတိုင်မီ အင်္ဂလန်ကစားသမားများ ဒူး ထောက်နေချိန်၌ ထွက်ပေါ်လာမည့် လှောင်ပြောင်သံများကို ဖုံးလွှမ်းစေရန် FA က စီစဉ်နေခြင်းဖြစ်သည်။
င်္FA တာဝန်ရှိသူများ၏ အစီအစဉ်အရ ကစားသမား များ ဒူးထောက်ချိန်မှစ၍ ပွဲမစမီစက္ကန့်ပိုင်းအလိုအထိ ဝင်ဘလေကွင်းအတွင်း သီချင်းသံကို ကျယ်လောင်စွာ ဖွင့်လှစ်သွားမည်ဖြစ်သည်။
ထို့ပြင် င်္FA တာဝန်ရှိသူများက Black Lives Matter အပြုအမူကို မလေးစားသည့်သဘောဖြင့် လှောင်ပြောင်သော ပရိသတ်များအား ရှာဖွေအရေးယူအပြစ်ပေးသွားမည်ဖြစ်ကြောင်းလည်း သတိပေးခဲ့သည်။
ယင်းကဲ့သို့ လှောင်ပြောင်သည့်ပရိသတ်ကို တွေ့ ရှိရပါက ပွဲကြည့်ခွင့်ပိတ်ပင်သည့်ပြစ်ဒဏ် ချမှတ်သွားမည် ဖြစ်ကြောင်း င်္FA တာဝန်ရှိသူများက ပြောကြားခဲ့ကြသည်။
”ဝင်ဘလေကွင်းအတွင်း ခွဲခြားဆက်ဆံခြင်း၊ တစ်ဖက်သားကို လေးစားမှုမရှိခြင်းအစရှိသည့် အပြုအမူများကို ကျူးလွန်သူများအား မိမိတို့ ပြင်းပြင်းထန်ထန်ရှုတ်ချပြီး လိုအပ်ပါက အင်္ဂလန်အသင်း၏ပွဲစဉ်များ လုံခြုံစိတ်ချမှုရှိစေရန် ၎င်းတို့အား အပြစ်ပေးအရေးယူသွားမည်”ဟု င်္FA က ကြေညာချက်ထုတ်ပြန်ခဲ့သည်။
