ဇွန်လ(၁၉)ရက်က ယှဉ်ပြိုင်ကစားခဲ့သည့် အင်ဒိုနီးရှား-အာဂျင်တီးနားခြေစမ်းပွဲတွင် အာဂျင်တီးနားအသင်းခေါင်းဆောင် မက်ဆီ မပါဝင်ခဲ့ခြင်းအတွက် အင်ဒိုနီးရှားပရိသတ်များက ဒေါသထွက်ခဲ့ကြကြောင်း သိရသည်။
မက်ဆီသည် သြစတြေးလျနှင့် ခြေစမ်းပွဲတွင် ပါဝင်ကစားပြီးနောက် လက်ရွေးစင်အသင်းလူစာရင်းမှ နုတ်ထွက်သွားခဲ့သည်။ မက်ဆီနှင့်အတူ ဒီမာရီယာ၊ အော်တာမန်ဒီစသည့် ဝါရင့်ကစားသမားများမှာလည်း အင်ဒိုနီးရှားခရီးစဉ်ကို လိုက်ပါလာခဲ့ခြင်းမရှိကြောင်း သိရသည်။
အာဂျင်တီးနား အသင်းနည်းပြ စကာလိုနီက မက်ဆီအပါအဝင် ဝါရင့်ကစားသမားအချို့သည် အနားယူချိန် ပိုမိုလိုအပ်နေသည်ဟု အကြောင်းပြခဲ့သည်။ ယင်းခြေစမ်းပွဲတွင် အင်ဒိုနီးရှားပရိသတ်များသည် မက်ဆီကို မြင်တွေ့နိုင်ရန် အားခဲထားခဲ့ပြီး လက်မှတ်စောင်ရေ (၆၀၀၀၀)ကျော်ရောင်းချခဲ့ရသည်။
“ကျွန်တော် ဝမ်းနည်းပြီး စိတ်ပျက်ရပါတယ်။ စိတ်ထိခိုက်မှုတွေနဲ့ ရောထွေးနေခဲ့တယ်။ မက်ဆီကစားတာကို မျက်မြင်ကိုယ်တွေ့ မြင်ရဖို့ဆိုတာ ကျွန်တော်တို့ အကြီးမားဆုံးအခွင့်အရေးပါ။ မက်ဆီဟာ Icon တစ်ဦးဖြစ် ပြီး လက်မှတ်စောင်ရေ(၉၀)ရာခိုင်နှုန်းကလည်း မက်ဆီကြောင့် ရောင်းချခဲ့ရတာပါ။ ဒါဟာ သူတို့(ပွဲစီစဉ်သူတွေ)အတွက် စီးပွားရေးဗျူဟာတစ်ခုပါပဲ” ဟု အင်ဒိုနီးရှားနိုင်ငံသားတစ်ဦးက AFP သို့ ပြောကြားခဲ့သည်။
ထို့ပြင် ယင်းပွဲကိုကြည့်ရှုရန် (၁၂)နာရီကြာလှေနှင့် လေယာဉ်စီးခဲ့ရသည့် ပရိသတ်တစ်ဦးကလည်း ပွဲစီစဉ်သူများသည် လိမ်လည်ကြော်ငြာခဲ့သည်ဟု စွပ်စွဲခဲ့သည်။ မက်ဆီသည် လာမည့်လတွင် အင်တာမိုင်ယာမီနှင့် ပူးပေါင်းမည်ဖြစ်သောကြောင့် စောစီးစွာအနားယူစေခြင်းဖြစ်ဖွယ်ရှိသည်။
