အင်တာသို့ပြန်မည်ဟု သတင်းထွက်နေသည့် လူကာကူက အနာဂတ်နှင့်ပတ်သက်ပြီး ပြောဆိုရန် ငြင်းဆန်

အင်တာမီလန်အသင်းသို့ ပြန်လည်ပြောင်းရွှေ့မည်ဟု သတင်းထွက်နေသည့် ချယ်လ်ဆီးတိုက်စစ်မှူး လူကာကူက ၎င်း၏ အနာဂတ်နှင့်ပတ်သက်ပြီး ပြောဆိုရန် ငြင်းဆန်ပယ်ချခဲ့ကြောင်း သိရှိရသည်။

အသက် ၂၉ နှစ်အရွယ်ရှိ ဘယ်လ်ဂျီယံလက်ရွေးစင်တိုက်စစ်မှူး လူကာကူသည် ပြီးခဲ့သည့် ၂၀၂၁ နွေရာသီအပြောင်းအရွှေ့ ကာလတွင် အင်တာမီလန်အသင်းမှ ချယ်လ်ဆီးအသင်းသို့ ကလပ်စံချိန်တင်ပြောင်းရွှေ့ ကြေး ပေါင် (၉၇.၅) သန်းဖြင့် ပြန်လည်ရောက်ရှိလာခဲ့သည်။

သို့သော် လူကာကူသည် ချယ်လ်ဆီးအသင်းတွင် ပုံမှန်ခြေစွမ်းရရန် ရုန်းကန်ခဲ့ရပြီး ပြိုင်ပွဲစုံ ၄၄ ပွဲတွင် ၁၅ ဂိုးသာ သွင်းယူနိုင်ခဲ့သည်။

ထို့ကြောင့် လူကာကူသည် လာမည့်ရာသီ အင်တာမီလန်အသင်းသို့ ပြန်လည်ပြောင်းရွှေ့ရန်စီစဉ်နေပြီး လစာ ၅၀ ရာခိုင်နှုန်းလျှော့ယူသွားရန် အသင့်ရှိနေကြောင်း သတင်းများထွက်ပေါ်နေသည်။

လူကာကူသည် လက်ရှိတွင် ဘယ်လ်ဂျီယံအသင်းနှင့် UEFA Nations League ပြိုင်ပွဲကစားနေပြီး ၎င်း၏အနာဂတ်နှင့်ပတ်သက်သည့် မေးမြန်းမှုများကို ဖြေဆိုရန် ငြင်းဆန်ခဲ့ကြောင်း သိရသည်။

နယ်သာလန်နှင့် ပွဲမတိုင်မီပြုလုပ်သည့် သတင်းစာရှင်းလင်းပွဲတွင် အနာဂတ်နှင့်ပတ်သက်ပြီး သတင်းထောက်တစ်ဦး၏မေးမြန်းမှုကို လူကာကူက “အနာဂတ်နဲ့ပတ်သက်ပြီး ကျွန်တော် ဘာမှပြောမှာ မဟုတ်ပါဘူး”ဟု ပြန်လည်တုံ့ပြန်ခဲ့သည်။

လူကာကူသည် ပြီးခဲ့သည့် ၂၀၂၁ ဒီဇင်ဘာတွင် ချယ်လ်ဆီးအသင်း၌ မပျော်မရွှင်နေသည်ဟု ပြောဆိုထားသည့် Sky Italia နှင့် အင်တာဗျူးထွက်ပေါ်လာသည့်အတွက် အသင်းကို ပြန်လည်တောင်းပန်ခဲ့ရဖူးသည်။