ပြီးခဲ့သည့် ရက်ပိုင်းအတွင်းက ပရီးမီးယားလိဂ်ကလပ် နယူးကာဆယ်အသင်းကို ဝယ်ယူရာတွင် ဦးဆောင်ခဲ့သော PIF ကုမ္ပဏီသည် စီးရီးအေကလပ် အင်တာမီလန်အသင်းကိုလည်း ဝယ်ယူဖွယ်ရှိကြောင်း သတင်းထွက်လာခဲ့သည်။
ဆော်ဒီအိမ်ရှေ့မင်းသား ဘင်ဆယ်လ်မန် ဦးဆောင်နေသည့် PIF ကုမ္ပဏီသည် အင်တာမီလန်အသင်းကို ဝယ်ယူရန်အတွက် လက်ရှိပိုင်ရှင်များဖြစ်သော ဆန်နင်းစီးပွားရေးအဖွဲ့အစည်းမှ တာဝန်ရှိသူများနှင့် အင်တာ-ရီးယဲလ် ချန်ပီယံလိဂ်ပွဲ ယှဉ်ပြိုင်ကစားစဉ် ဆွေးနွေးခဲ့ကြကြောင်း၊ ယူရိုသန်း (၁၀၀၀)ဖြင့် အရောင်းအဝယ်ပြုလုပ်ရန် သဘောတူညီမှုရရှိလုနီးပါးဖြစ်နေပြီဖြစ်ကြောင်း သတင်းထွက်ခဲ့ခြင်းဖြစ်သည်။
သို့သော် မီလန်မြို့အခြေစိုက် Corriere della Sera သတင်းစာက သတင်းအတုသာဖြစ်ကြောင်း တုံ့ပြန်ဖော်ပြခဲ့သည်။
ယင်းသတင်းစာက အင်တာမီလန်အသင်း၏ လက်ရှိတရုတ်ပိုင်ရှင်များသည် ဘဏ္ဍာရေးပြဿနာနှင့် ရင်ဆိုင်နေရသော်လည်း အသင်းအား ရောင်းချရန် အစီအစဉ်မရှိသလို၊ နယူးကာဆယ်အသင်းကို ဝယ်ယူထားပြီးဖြစ်သည့် PIF ကလည်း နောက်ထပ်အသင်းသစ်တစ်သင်း ထပ်မံဝယ်ယူရန် အစီအစဉ်မရှိကြောင်း ဖော်ပြခဲ့ခြင်းဖြစ်သည်။
PIF သည် နယူးကာဆယ်အသင်းအား အင်္ဂလန်ဘောလုံးလောကတွင်သာမက ကမ္ဘာ့ဘောလုံးလောကတွင်ပါ ထိပ်သီးအသင်းဖြစ်လာရန် ရည်မှန်းထားရာ ယင်းအတွက်သာ အာရုံစိုက်လုပ်ဆောင်သွားလိမ့်မည်ဟုလည်း သုံးသပ်ခဲ့သည်။
