အဂွဲရိုးနှင့် လွန်းဂလတ်တို့ ဒဏ်ရာပြဿနာများရှိနေပြီး ကော်တင်ဟို ကြံ့ခိုင်မှုပြည့်ဝနေ

ဘာစီလိုနာအသင်း၏ တိုက်စစ်မှူးသစ်ဖြစ်သူ အဂွဲရိုးနှင့် နောက်ခံလူ လွန်းဂလတ်တို့မှာ ဒဏ်ရာပြဿနာများ အသီးသီးကြုံတွေ့နေပြီး ဂျူဗင်တပ်စ်အသင်းနှင့်ယှဉ်ပြိုင်ခဲ့သည့် ရာသီကြို ယိုအန်ဂမ်ပါဖလားပွဲစဉ်အား လွဲချော်ခဲ့ကြောင်းသိရသည်။

ယခုနွေရာသီတွင် မန်စီးတီးအသင်းမှ ပြောင်းရွှေ့လာခဲ့သည့် အဂွဲရိုးသည် ညာဘက်ခြေသလုံး ဒဏ်ရာရရှိနေခြင်းဖြစ်သည်။

ပြင်သစ်နောက်ခံလူ လွန်းဂလတ်မှာမူ ညာဘက်ဒူး ဒဏ်ရာရရှိနေခြင်းဖြစ်သည်။

ယင်းကစားသမား (၂)ဦးစလုံး၏ ဒဏ်ရာအခြေအနေအား အသေးစိတ်မသိရှိရသေးဘဲ ဘာစီလိုနာနည်းပြ ကိုးမန်းက ရာသီအစတွင် ပြန်လည် ကစားနိုင်ရန် မျှော်လင့်လျက်ရှိနေသည်။

လာမည့်အပတ်တွင်ကစားမည့် ဆိုစီဒက်နှင့် လာလီဂါအဖွင့်ပွဲကို ၎င်းတို့(၂)ဦးစလုံး လွဲချော်ရမည့်အနေအထားရှိကြောင်း သိရသည်။

ဘာစီလိုနာကွင်းလယ်လူ ကော်တင်ဟိုမှာမူ ကြံ့ခိုင်မှုပြည့်ဝနေပြီး ပြီးခဲ့သည့် ယိုအန်ဂမ်ပါဖလားပွဲတွင် အသင်းအရန်စာရင်း၌ ပါဝင်ခဲ့သည်။

ကော်တင်ဟိုအနေဖြင့် ပြီးခဲ့သည့်ရာသီကလည်း ဒဏ်ရာများနှင့် ရုန်းကန်ခဲ့ရပြီး ပြိုင်ပွဲစုံ (၁၄)ပွဲသာ ကစားခဲ့ရသည်။