နယူးကာဆယ်အသင်းသည် လစ်လပ်နေသည့် နည်းပြရာထူးအတွက် ဘုန်းမောက် အသင်းနည်းပြဟောင်း အက်ဒီဟောင်းကို နှစ်နှစ်ခွဲစာချုပ်ဖြင့် ခန့်အပ်ရန် မူအားဖြင့် သဘောတူညီမှုရထားပြီဖြစ်ကြောင်း ဗြိတိန်သတင်းဌာနများ၏ ဖော်ပြမှုအရ သိရသည်။
နယူးကာဆယ်အသင်းသည် အောက်တိုဘာ ၂၀ ရက်တွင် နည်းပြဖြစ်သူ စတိဗ်ဘရုစ်ကို ထုတ်ပယ်ပြီးနောက် နည်းပြတစ်ဦး ပြန်လည်ခန့်အပ်ရန် ကြိုးပမ်းလျက်ရှိသည်။
ယင်းရာထူးအတွက် ဗီလာရီးယဲလ်အသင်း နည်းပြ အူနိုင်းအမ်မရီကို ပစ်မှတ်ထားခဲ့သော်လည်း ၎င်းက လက်ခံမည်မဟုတ်ကြောင်း အင်္ဂါနေ့ညပိုင်းတွင် ထုတ်ဖော်ပြောကြားခဲ့သောကြောင့် အက်ဒီဟောင်းကို ပြောင်းလဲ၍ ကြိုးပမ်းခဲ့ခြင်းဖြစ်သည်။
နယူးကာဆယ်အသင်း ဒါရိုက်တာဖြစ်သူ အာမန်ဒါစတေ့ဗ်လေသည် ပြီးခဲ့သည့်ရက်ပိုင်းက အက်ဒီဟောင်းနှင့် ဆွေးနွေးမှုပြုလုပ်ခဲ့ပြီး ၎င်း၏တင်ပြမှုအပေါ် သဘောကျနေကြောင်း သိရသည်။
BBC နှင့် The Guardian အပါအဝင် ဗြိတိန်သတင်းဌာနများ၏ဖော်ပြမှုအရ နယူးကာဆယ်အသင်းသည် အက်ဒီဟောင်းကို ၂၀၂၄ ခုနှစ်အထိ သက်တမ်းရှိသည့် နှစ်နှစ်ခွဲ စာချုပ်ချုပ်ဆိုရန် မူအားဖြင့် သဘောတူညီမှုရထားပြီး အသေးစိတ်အချက်အလက်များ ဆက်လက်ညှိနှိုင်းရန်သာ ကျန်ရှိတော့သည်။
အသက် ၄၃ နှစ်သာရှိသေးသူ အက်ဒီ ဟောင်းသည် ဘုန်းမောက်အသင်း (နှစ်ကြိမ်)နှင့် ဘန်လေအသင်းကို ကိုင်တွယ်ဖူးသူဖြစ်ပြီး ၂၀၁၉-၂၀ ဘုန်းမောက်အသင်း ပရီးမီးယားလိဂ်မှ တန်းဆင်းခဲ့ရပြီးနောက် အသင်းနှင့်လမ်းခွဲပြီး ယင်းကတည်းက အသင်းလက်မဲ့ဖြစ်နေသူဖြစ်သည်။
ယနေ့ ကစားမည့်ပွဲကိုမူ ယာယီနည်းပြ ဂရေမီဂျုံးစ်သာ ဆက်လက်ကိုင်တွယ်မည်ဖြစ်သည်။
