အဲဗာတန်အသင်း၏ ပရိသတ်များသည် အက်စတွန်ဗီလာအသင်းကို ရှုံးနိမ့်ခဲ့ပြီးနောက် အသင်းပိုင်ရှင်နှင့် ဘုတ်အဖွဲ့ ရာထူးမှ နုတ်ထွက်ပေးရန် ဆန္ဒပြတောင်းဆိုခဲ့ကြကြောင်း သိရသည်။
ယင်းပွဲရလဒ်မှာ အဲဗာတန်အသင်းအတွက် ယခုရာသီ ပရီးမီးယားလိဂ်ပြိုင်ပွဲတွင် (၁၁)ပွဲမြောက် ရှုံးနိမ့်ခြင်းဖြစ်ပြီး တန်းဆင်းဇုန်ထဲမှ အသင်းများနှင့် အမှတ်သိပ်မကွာတော့သည့် အနေအထားဖြစ်လာခဲ့သည်။
ထို့ကြောင့် အဲဗာတန်ပရိသတ်အချို့သည် ပွဲအပြီးတွင် ကွင်းပြင်သို့ ချက်ချင်းမထွက်ခွာဘဲ ဆန္ဒပြမှုများ ပြုလုပ်ခဲ့ခြင်းဖြစ်သည်။
အဲဗာတန်ပရိသတ်များသည် ”အသင်း ဥက္ကဋ္ဌ ကင်ရိုက်နှင့် အပေါင်းအပါများ အသင်းမှ ထွက်ခွာသင့်ပြီ”ဆိုသည့်စာသား၊ ”ဘုတ်အဖွဲ့ကိုထုတ်ပစ်”ဟူသည့် စာသားများ ကိုင်ဆောင်ကာ ဆန္ဒပြတောင်းဆိုခဲ့ကြခြင်းဖြစ်သည်။
ထို့ပြင် ကွင်းပြင်တွင်လည်း ဆန္ဒပြမှုများ ဆက်လက်ပြုလုပ်ခဲ့ရာ အဲဗာတန်အသင်း ဥက္ကဋ္ဌ ဘီလ်ကင်ရိုက်က ပရိသတ်အချို့နှင့် စကားပြောခဲ့ကြောင်းလည်း သိရသည်။
အဲဗာတန်ပရိသတ်များသည် ရည်မှန်းချက်ကင်းမဲ့သလိုဖြစ်နေသော အသင်း၏အခြေအနေအပေါ် အလိုမကျ၍ ဆန္ဒပြခြင်းဖြစ်ကြောင်း သိရသည်။
