ဒေါ့မွန်တိုက်စစ်မှူး ဟော်လန်းကို ခေါ်ယူမည်ဆိုလျှင် ရီးယဲလ်အသင်းမှ ထွက်ခွာမည်ဟု တိုက်စစ်မှူး ဘန်ဇီမာ ခြိမ်းခြောက်ထားကြောင်း သတင်းများထွက်ပေါ်နေသည်။
ရီးယဲလ်အသင်းဥက္ကဋ္ဌ ဖလော်ရင်တီနိုပီရက်ဇ်သည် လာမည့်နွေရာသီအပြောင်းအရွှေ့တွင် တိုက်စစ်မှူးအသစ်တစ်ဦးခေါ်ယူရန်စီစဉ်နေပြီး ဟော်လန်းအပြင် PSG ကြယ်ပွင့် ဘာပေကိုလည်း ပစ်မှတ်ထားနေသည်။
အဆိုပါအခြေအနေများနှင့်ပတ်သက်၍ ရီးယဲလ်ဂန္ထဝင်တိုက်စစ်မှူး ဘန်ဇီမာက စိတ်မသက်မသာဖြစ်နေပြီး တိုက်စစ်မှူးအသစ်တစ်ဦး အမှန်တကယ်ခေါ်ယူခဲ့ပါက အသင်းမှ ထွက်ခွာမည်ဟု ခြိမ်းခြောက်ထားကြောင်း သိရသည်။
အသက် (၃၄)နှစ်အရွယ် ဘန်ဇီမာသည် လက်ရှိရာသီတွင် ရီးယဲလ်အသင်းအတွက် (၂၇)ပွဲကစားထားပြီး (၂၄)ဂိုးအထိ သွင်းယူကာ အကောင်းဆုံးစွမ်းဆောင်ရည် ပြသနေဆဲဖြစ်သည်။
El Nacional ၏ ဖော်ပြချက်အရ ရီးယဲလ်အသင်းသည် ဘန်ဇီမာခေတ်လွန် No.9 Role အတွက် ဟော်လန်းကို ပစ်မှတ်ထားနေခြင်းဖြစ်ပြီး ဘန်ဇီမာဘက်ကမူ နောက်ထပ်နှစ်အနည်းငယ်ကြာ ပုံစံကောင်းပြသနိုင်မည်ဟု ယုံကြည်နေသဖြင့် ရီးယဲလ်အသင်း၏အစီအစဉ်အား စိတ်ပျက်နေခြင်းဖြစ်ကြောင်း သိရသည်။
ဘန်ဇီမာက ခြိမ်းခြောက်ပြောဆိုပြီးနောက် ဖလော်ရင်တီနိုပီရက်ဇ်သည် သူ၏စိတ်ကူးကို ပြန်လည်သုံးသပ်ဖွယ်ရှိနေပြီး အကယ်၍ ဟော်လန်းကို မူလစိတ်ကူးအတိုင်း ခေါ်ယူနိုင်ခဲ့ပါကလည်း ဘန်ဇီမာကိုသာ ဦးစားပေးတိုက်စစ်မှူးအဖြစ် အသုံးပြုသွားရန် နည်းပြဖြစ်သူအား ဖိအားပေးသွားမည်ဖြစ်ကြောင်း သိရသည်။
ဘန်ဇီမာသည် ဖလော်ရင်တီနိုပီရက်ဇ်နှင့် ရင်းနှီးသောဆက်ဆံရေးရှိသူဖြစ်ပြီး ရီးယဲလ်အသင်းအတွက် ဘန်ဇီမာပေးဆပ်ခဲ့သည့်အရာများကိုလည်း ထောက်ထားရမည်ဖြစ်ကြောင်း ကျွမ်းကျင်သူများက သုံးသပ်နေကြသည်။
သတင်းများအတိုင်း ရီးယဲလ်အသင်းနှင့် ဘန်ဇီမာတို့ကြား မပြေလည်မှုများဖြစ် ပေါ်လာပါက PSG အသင်းသည် ဘန်ဇီမာကို ခေါ်ယူရန် ကြိုးပမ်းသွားဖွယ်ရှိနေကြောင်း သိရသည်။
PSG အသင်းသည် တိုက်စစ်ပိုင်းအတွက် အတွေ့အကြုံရင့်သူတစ်ဦးခေါ်ယူသွားရန် ဆန္ဒရှိနေပြီး ဘန်ဇီမာကိုယ်တိုင်လည်း ကစားသမားဘဝကို ပြင်သစ်မြေတွင် အဆုံးသတ်ချင်နေသည်။
