မန်စီးတီးအသင်း၏ နည်းပြဖြစ်သူ ဂွါဒီယိုလာက မန်စီးတီးအသင်းသည် စပါးအသင်း၏တိုက်စစ်မှူး ဟာရီကိန်းအား ခေါ်ယူရန် ဆွေးနွေးမှုများ ပြုလုပ်နေသည်ဟု သတင်းများထွက် ပေါ်နေသော်လည်း ယခုနွေရာသီတွင် ခေါ်ယူနိုင်စွမ်းမရှိဟု ကတ်တလန်အခြေစိုက် TV3 နှင့် တွေ့ဆုံရာတွင် ပြောကြားခဲ့သည်။
မန်စီးတီးအသင်းသည် လက်ရှိအချိန်တွင် အဂွဲရိုးအား အလွတ်ပြောင်းရွှေ့ကြေးဖြင့် ဆုံးရှုံးထားရပြီး ယင်းနေရာအတွက် အစားထိုးရန် ထိပ်တန်းတိုက်စစ်မှူးများကို ခေါ်ယူရန် စီစဉ်နေသည်ဟု သတင်းထွက်ပေါ်နေသည်။
သို့သော် ဂွါဒီယိုလာက မန်စီးတီးအသင်းမှာလည်း ကိုရိုနာဗိုင်းရပ်စ်ကပ်ဘေးကြောင့် ဘဏ္ဍာရေးအကျပ်အတည်းနှင့် ရင်ဆိုင်နေရပြီး ယခုနွေရာသီတွင် တိုက်စစ်မှူးသစ် ဝယ်နိုင်ဖွယ်မရှိကြောင်း ပြောကြားခဲ့ခြင်းဖြစ်သည်။
ဂွါဒီယိုလာက “ဒီလောက် စျေးကြီးတဲ့ တိုက်စစ်မှူးတွေကို ဒီနွေရာသီမှာ ကျွန်တော်တို့ မဝယ်နိုင်ဘူးလို့ ထင်ပါတယ်။ ကလပ်အသင်းအားလုံးဟာ ဘဏ္ဍာရေးအကျပ်အတည်းနဲ့ ရင်ဆိုင်နေရပြီး ဒီအထဲမှာ မန်စီးတီးအသင်းလည်း ခြွင်းချက်မရှိပါဘူး။ ကျွန်တော်တို့အသင်းမှာ ဂျေးဇူး၊ ဖယ်ရန်တောရက်စ်တို့ရှိနေပြီး သူတို့ကလည်း တိုက်စစ်နေရာမှာ အရမ်း ကောင်းတဲ့ ကစားသမားတွေပါ။ ပြီးတော့ ကျွန်တော်တို့ရဲ့ အကယ်ဒမီမှာ ကစားသမားကောင်းတွေရှိနေပြီး ကျွန်တော်တို့အသင်းက တစ်ခါတစ်ရံမှာ တိုက်စစ်မှူးမပါဘဲ ကစားလေ့ရှှိပါတယ်။ ဒါကြောင့် လာမယ့်နွေရာသီမှာ တိုက်စစ်မှူးသစ် မခေါ်ဖို့ များပါ တယ်”ဟု ဆိုခဲ့သည်။
ဂွါဒီယိုလာက အဂွဲရိုးကိုလည်း ဘဏ္ဍာရေးအခြေအနေကြောင့်သာ လက်လွှတ်ခဲ့ခြင်းဖြစ်ပြီး အစားထိုးမရသည့် ကစားသမားဟုလည်း ဆိုခဲ့သည်။
