မန်စီးတီးကွင်းလယ်လူဟောင်း ယာယာတိုရေးက အင်္ဂလန်တိုက်စစ်မှူး ဟာရီကိန်းအား စပါးအသင်းတွင် ကစားသမားဘဝကုန်ဆုံးသည်အထိ ဆက်ကစားသွားရန် တိုက်တွန်းပြောကြားခဲ့သည်။
အသက် (၂၉)နှစ်အရွယ်ရှိ ဟာရီကိန်းသည် ယခုနွေတွင် စပါးအသင်းမှ ထွက်ခွာမည်ဟု သတင်းထွက်နေပြီး ၎င်းကိုခေါ်ယူရန် ဘိုင်ယန်မြူးနစ်အသင်းက ကမ်းလှမ်းမှုများပါ ပြုလုပ်ထားကြောင်း သိရှိရသည်။
သို့သော် စပါးအသင်းသည် အသင်းနှင့် စာချုပ်သက်တမ်း (၁)နှစ်သာ ကျန်ရှိတော့သည့် ဟာရီကိန်းအား လုံးဝရောင်းထုတ်လိုခြင်းမရှိကြောင်း သိရှိရသည်။
ယခုအခါ စပါးအသင်း၏ အကယ်ဒမီတွင် နည်းပြအဖြစ် ဆောင်ရွက်ခဲ့ဖူးသည့် မန်စီးတီးကွင်းလယ်လူဟောင်း ယာယာတိုရေးက ဟာရီကိန်းအနေဖြင့် ကစားသမားဘ၀ စတင်ခဲ့သည့် စပါးအသင်းတွင်သာ ကစားသမားဘ၀ အဆုံးသတ်သင့်ကြောင်း ပြောကြားခဲ့ခြင်းဖြစ်သည်။
ယာယာတိုရေးက “ဟာရီကိန်းက အရမ်းတော်တဲ့ ကစားသမားဖြစ်သလို ခေါင်းဆောင်တစ်ဦးလည်း ဖြစ်ပါတယ်။ ကျွန်တော်ကတော့ သူ့ကို စပါးမှာပဲ ဆက်နေစေချင်တယ်။ ပြီးခဲ့တဲ့ရာသီက သူ စွမ်းဆောင်ခဲ့တာ အရမ်းကောင်းပါတယ်။ သူက စပါးအ ကယ်ဒမီကထွက်ပေါ်လာပြီး တခြားကစားသမားတွေနဲ့ ကွဲပြားခြားနားသူပါ။ သူ့အနေနဲ့ မာလ်ဒီနီလို ကလပ်အသင်းတစ်သင်းထဲမှာပဲ ဘာလို့မကစားနိုင်ရမှာလဲ။ မာလ်ဒီနီလိုသာ လုပ်မယ်ဆိုရင် တကယ်ထူးခြားမှာပါ” ဟု ပြောကြားခဲ့သည်။
