စပါးအသင်း၏ နည်းပြဖြစ်သူ မော်ရင်ဟိုက အသင်း၏ တိုက်စစ်မှူး ဟာရီကိန်းသည် လက်ရှိအချိန်တွင် ကမ္ဘာ့အကောင်းဆုံးစာရင်းဝင်တိုက် စစ်မှူးတစ်ဦးဖြစ်ပြီး၊ စပါးအသင်းသည် ၎င်းအပေါ် မှီခိုနေရသည်ဟုလည်း ဝန်ခံပြောကြားသွားခဲ့သည်။
စပါးအသင်းသည် ဟာရီကိန်း ဒဏ်ရာက ပထမဆုံးပြန်လာသည့် ပွဲတွင် ဝက်စ်ဘရွန်းအသင်းကို (၂-ဝ) ဂိုးဖြင့် အနိုင်ရရှိခဲ့ပြီး ယင်းပွဲတွင် ဟာရီကိန်းက စပါးအသင်းအတွက် ဦးဆောင်ဂိုးကိုလည်း သွင်းယူခဲ့သည်။
ယင်းအတွက်ကြောင့် မော်ရင်ဟိုက “သူက စပါးအသင်းရဲ့သမိုင်းမှာ အထူးကစားသမားတစ်ဦးဖြစ်သလို၊ အသင်းမှာရှိသမျှ စံချိန်အားလုံးကိုလည်း ရိုက်ချိုးမယ့်သူပါ။ သူက လက်ရှိကမ္ဘာ့ ဘောလုံးလောကရဲ့အကောင်းဆုံး စာရင်းဝင်တိုက်စစ်မှူး တစ်ဦးလည်း ဖြစ်တယ်။ ဒီစကားကို ဘယ်သူမှ ငြင်းနိုင်မှာမဟုတ်ဘူး။ စပါးအသင်းဟာ သူ့အပေါ်မှာ အများကြီး မှီခိုထားရပါတယ်။ ဒါကို ကျွန်တော် မလိမ်ချင်ပါဘူး။ သူက ဂိုးတွေသွင်းနိုင်တယ်။ ဂိုးဖန်တီးမှုတွေ ပြုလုပ်နိုင်တယ်။ တိုက်စစ်ပိုင်းမှာ ချိတ်ဆက်ကစားပေးနိုင်တယ်။ သူက ထိပ်တန်းအဆင့် ကစားသမားတွေရဲ့ ကိုယ်ရည်ကိုယ်သွေးမျိုးရှိပြီး အသင်းအပေါ် လွှမ်းမိုးနိုင်စွမ်းကြီးမားသူလည်းဖြစ်ပါတယ်။ အသင်းက (၃)ပွဲဆက် ရှုံးပြီး ခက်ခဲနေတဲ့ အချိန်မှာ ဘယ်ကစားသမားနာမည်ကိုမှ တပ်ပြီး မချီးကျူးဘူးလို့ ကျွန်တော် ဆုံးဖြတ်ထားပေမယ့် ဟာရီကိန်းကို မချီးကျူးဖို့ဆိုတာကတော့ တော်တော်လေးခက်ခဲပါတယ်” ဟု ဆိုခဲ့သည်။
မော်ရင်ဟိုက ယခုနိုင်ပွဲသည် အသင်းအတွက် အလွန်အရေးပါပြီး အထူးသဖြင့် Clean Sheet ရရှိခဲ့ခြင်းအပေါ် အလွန်ကျေနပ်မိသည်ဟုလည်း ပြောကြားခဲ့သည်။
