စပါးအသင်းတိုက်စစ်မှူး ဟယ်ရီကိန်း၏ ကိုယ်စားလှယ်များသည် ပြင်သစ်ကလပ် ပီအက်စ်ဂျီအသင်း အားကစားဒါရိုက်တာ လူးဝစ်ကမ်ပို့စ်နှင့် တွေ့ဆုံမှုပြုလုပ်ခဲ့သည်။ အင်္ဂလန်အသင်းခေါင်းဆောင်သည် ၂၀၂၄ နွေရာသီတွင် စပါးနှင့် စာချုပ်သက်တမ်းကုန်ဆုံးမည်ဖြစ်ပြီးလာမည့်နွေရာသီတွင် လန်ဒန်အခြေစိုက် ကလပ်အသင်းကို စွန့်ခွာရန် အလားအလာများနေသည်။
အသက် ၂၉ နှစ်အရွယ်ရှိ ကိန်းသည် ပရီးမီးယားလိဂ်ကလပ် မန်ယူသို့ ပြောင်းရွှေ့ရန် သတင်းများကျယ်ကျယ်ပြန့်ပြန့်ထွက်ပေါ်နေသော်လည်း ယခုအခါ ၎င်းကို ခေါ်ယူရေး တိုက်ပွဲတွင် ပီအက်စ်ဂျီအသင်းက ပါဝင်လာခြင်းဖြစ်သည်။
ပီအက်စ်ဂျီအားကစားဒါရိုက်တာ ကမ်ပို့စ်သည် ပြီးခဲ့သည့်ရက်ပိုင်းက ဟယ်ရီကိန်းကို ကိုယ်တိုင်တွေ့ဆုံခဲ့ပြီး အပြောင်းအရွှေ့အလားအလာများကို ဆွေးနွေးခဲ့ကြောင်း ကိန်း၏ သဘောထားကိုမူ သဲသဲကွဲကွဲသိရခြင်းမရှိသေးကြောင်း မီဒီယာများက ဆက်လက်ဖော်ပြသည်။
ပီအက်စ်ဂျီသည် ကြယ်ပွင့်ကစားသမားမက်ဆီနှင့် လမ်းခွဲတော့မည်ဖြစ်ပြီး တိုက်စစ်မှူးစစ်စစ် ကစားသမားတစ်ဦးကို ခေါ်ယူလိုသည်။ ပြီးခဲ့သည့်နှစ်တွင် ပိုလန်တိုက်စစ်မှူး လီဝမ်ဒေါ့စကီးကို လက်လွှတ်ခဲ့ရခြင်းကြောင့် ယခုတစ်ကြိမ်တွင်မူ ကိန်းကို လက်လွတ်ခံတော့မည်မဟုတ်ဟု သတင်းများက သုံးသပ်ဖော်ပြသည်။
ပီအက်စ်ဂျီသည် ဟယ်ရီကိန်းကို နွေရာသီအပြောင်းအရွှေ့အတွက် နံပါတ်တစ်ပစ်မှတ်အဖြစ် သတ်မှတ်ထားသည်။ ကိန်းကို ခေါ်၍မရပါက နာပိုလီမှ အိုဆင်ဟမ်ကို ခေါ်ယူရန်လည်း ပစ်မှတ်ထားနေသည်။
