ဟယ်ရီကိန်းကို ခေါ်ယူလိုတဲ့ အသင်းတွေအထဲ ချဲလ်ဆီးလည်း ပါဝင်နေခြင်း အပေါ် ပြန်လည် တုန့်ပြန်လာတဲ့ တူချယ်
တော့တင်ဟမ် အသင်းရဲ့ အင်္ဂလန် လက်ရွေးစင် တိုက်စစ်မှူး ဟယ်ရီကိန်း ဟာ လာမယ့် နွေရာသီ အပြောင်းအရွှေ့ ဈေးကွက်မှာ အသင်းပြောင်းချင်တယ်လို့ ကိုယ်တိုင် တရားဝင် ထုတ်ဖော် ပြောဆိုခဲ့ပြီးနောက် ၊ ဥရောပ အသင်းကြီး တချို့ဟာ ၎င်းကို ခေါ်ယူဖို့ အပြိုင် စိတ်ဝင်စားလာကြပါတယ် ။
တဖက်မှာ ကိုဗစ် ကာလအတွင်း ၊ ကလပ် အသင်းတွေရဲ့ ဘဏ္ဍာရေး ထိခိုက်မှု အနည်းနဲ့ အများရှိနေချိန် ၊ ဟယ်ရီကိန်း ကို တကယ်တမ်း ငွေကြေး အမြောက်အမြား ပေးပြီး ခေါ်ယူနိုင်မယ့် အသင်း များများစားစား ရှိမနေပါဘူး ။ ဒီအထဲမှာ ၎င်း ပြောင်းရွှေ့ဖို့ ဖြစ်နိုင်ခြေ နည်းတဲ့ လန်ဒန်ဒါဘီ ပြိုင်ဖက် ချဲလ်ဆီး အသင်းလည်း တသင်း အပါအဝင် ဖြစ်ပါတယ် ။
ပြီးခဲ့တဲ့ နွေရာသီမှာ လစ်ပ်ဇစ် အသင်းကနေ ဂျာမန် လက်ရွေးစင် တိုက်စစ်မှူး တီမို ဗာနာကို ယူရိုသန်း ၅၀ နဲ့ ချဲလ်ဆီးတို့ ခေါ်ယူ အားဖြည့်ခဲ့ပေမယ့် ၊ ရာသီကုန်ဖို့ တပတ်သာသာပဲ လိုတော့တဲ့ အချိန် အထိ ၎င်းရဲ့ သွင်းဂိုး အရေအတွက်က အတော်လေး စိတ်ပျက်စရာ ကောင်းခဲ့ပါတယ် ။
ဒီတော့ ချဲလ်ဆီး ဟာ လာမယ့် နွေရာသီ ဈေးကွက်မှာလည်း တိုက်စစ်မှူး ရှာပုံတော် ထွက်မှာ ဖြစ်ပြီး ၊ ၎င်းတို့ရဲ့ ပစ်မှတ်တွေထဲမှာ ရိုမီလူ လူကာကူ ၊ အာလင်း ဟာလန်း ၊ ရောဘတ် လီဝန်ဒေါစကီး တို့အပြင် ဟယ်ရီကိန်းလည်း ရှိနေပါတယ် ။ မနေ့က ပွဲကြို သတင်းစာ ရှင်းလင်းပွဲမှာတော့ ချဲလ်ဆီး နည်းပြ သောမတ်စ် တူချယ် က ဒီအကြောင်း အပေါ် အခုလိုပဲ တုန့်ပြန်ခဲ့ပါတယ် ။
တူချယ် က ” ဒီ ကမ္ဘာမှာ ဟယ်ရီကိန်း ကို မခေါ်ချင်တဲ့ နည်းပြ ရှိမယ်ဆိုရင် ကျွန်တော့ကို လာခေါ်ပြီး ပြနိုင်ပါတယ် ။ သူ့လို ကစားသမားမျိုးနဲ့ ကျွန်တော် စကားပြောလိုပါတယ် ။ သူ့ဆီက ဂိုးသွင်း နည်းစနစ်နဲ့ တိုက်စစ် ကစားဟန် နဲ့ ပတ်သက်တဲ့ အကြောင်းအရာတွေ ကြားချင်ပါတယ် ။ ”
” လူတိုင်းဟာ ဟယ်ရီကိန်းကို နှစ်သက်ကြပါတယ် ။ ဒါပေမယ့် အားလုံးကို သေသေချာချာ နားလည်အောင် ရှင်းပြရရင် ၊ သူဟာ တော့တင်ဟမ် အသင်းသား တယောက် အဖြစ် ရှိနေသေးတယ် ဆိုတာပါ ။ သူဟာ အဲဒီ ကလပ်နဲ့ နှစ်ရှည် စာချုပ် ချုပ်ဆိုထားတဲ့ ကစားသမား ဖြစ်ပြီး ၊ ဒီအကြောင်းကို မလေးမစား လုပ်ပြီး ၊ သတင်းစာ ရှင်းလင်းပွဲမှာ ကျွန်တော့ အနေနဲ့ မှတ်ချက်ပေးဖို့လည်း မရှိပါဘူး ။ ” လို့ ပြောကြားခဲ့ပါတယ် ။
ချဲလ်ဆီး အသင်း ဟာ လိုအပ်နေတဲ့ ကွက်လပ် တခု ဖြစ်တဲ့ ပုံမှန် ဂိုးသွင်းပေးမယ့် တိုက်စစ်မှူး တဦးကို ခေါ်ယူဖို့ ၊ လာမယ့် ဈေးကွက်မှာ အသင်းအတွင်း မလိုအပ်တော့တဲ့ ကစားသမား တချို့ ဖြစ်တဲ့ တမ်မီ အေဘရာဟမ် ၊ ကီပါ အရီဇာဘာလာဂါ တို့ကို ယင်း တိုက်စစ်မှူးတွေရဲ့ ပြောင်းရွှေ့ကြေး တစိတ်တပိုင်း အဖြစ် အသုံးပြုသွားဖွယ် ရှိတယ်လို့လည်း သတင်းတွေ ထွက်ပေါ်နေပါတယ် ။
တဖက်မှာ ချဲလ်ဆီး အသင်းဟာ မနက်ဖြန်ညမှာ ပရီးမီးယားလိဂ် ရာသီသိမ်း ပွဲစဉ် အဖြစ် အက်စတွန် ဗီလာ အသင်းကို အဝေးကွင်းမှာ သွားရောက် ကစားရမှာ ဖြစ်ပြီး ၊ လာမယ့် ရာသီ ချန်ပီယံလိဂ် ဝင်ခွင့် အတွက် ဒီပွဲကို မဖြစ်မနေ အနိုင်ကစားဖို့ လိုနေပါတယ် ။
သောမတ်စ် တူချယ် ကတော့ ဗီလာနဲ့ အဆုံးအဖြတ် ပွဲအတွက် ဖိအားတွေအောက် ရောက်နေတဲ့ တီမို ဗာနာ ကို ဆက်လက် ယုံကြည်ထားကြောင်းကို ” တနင်္ဂနွေနေ့မှာ ကျွန်တော်တို့ လိုချင်တဲ့ ပန်းတိုင် ရောက်ဖို့ မျှော်မှန်းထားပါတယ် ။ တီမို ဟာ ငယ်ရွယ်သေးသလို ၊ ရှေ့ဆက်လည်း တိုးတက်နိုင်ပါသေးတယ် ။ ”
” ဒါဟာ တပတ်ပြီး တပတ် သူ့ဆီကနေ ကျွန်တော်တို့ တောင်းဆိုထားတဲ့ အရာ ဖြစ်ပါတယ် ။ သူ့မှာ စိတ်အနားပေးဖို့ အချိန်ရမယ် ၊ ပြီးခဲ့တာတွေကို သေသေချာချာ ပြန်သုံးသပ် စဉ်းစားချိန် ရမယ်ဆိုရင် ၊ လာမယ့်နှစ်မှာ သူ နောက်ထပ် အဆင့်တွေ ဆက်တက်နိုင်ပါတယ် ။ သူဟာ ဒီလိဂ်နဲ့ မစိမ်းတော့ပါဘူး ။ ”
” နောက်ရာသီ သူဟာ ဒီ အသင်းဖော်တွေနဲ့ ပိုမို အချိတ်အဆက် မိလာနိုင်ပြီး ၊ ဒီ ပတ်ဝန်းကျင် အကြောင်းလည်း သေသေချာချာ ပိုသိလာမှာပါ ။ ကျွန်တော် တို့ဟာ သူ့ရဲ့ ဂိုးသွင်း စွမ်းရည်ကို လိုအပ်တဲ့ အတွက် ခြေစွမ်း တိုးတက်လာဖို့ သူ့ကို တောက်လျှောက် တွန်းအားပေးနေဦးမှာပါ ။ ”
” ဥရောပ ထိပ်တန်း ဂိုးသွင်းရှင် တော်တော်များများ ဟာ သူတို့ ကလပ်တွေရဲ့ ပင်တိုင် ပင်နယ်တီ ကန်သွင်းနေတဲ့ ကစားသမားတွေ ဆိုတာကို မမေ့ပါနဲ့ ။ ဒါဟာ သူတို့ ရနေတဲ့ ဂိုးအရေအတွက် လွယ်လွယ်ကူကူ ရောက်ရှိစေတဲ့ နည်းတနည်း ဖြစ်ပါတယ် ။ ”
” အကယ်၍ ဒီရာသီ ကျွန်တော်တို့ ရခဲ့တဲ့ ပင်နယ်တီ ဂိုးအရေအတွက်သာ တီမို ရဲ့ ဂိုးပေါင်းမှာ ထည့်တွက်လိုက်မယ် ဆိုရင် ၊ လူတိုင်း သူ့ရဲ့ စွမ်းဆောင်ရည် အပေါ် ပိုပြီး အားရကျေနပ်ကြမှာပါ ။ ဒါပေမယ့် သူဟာ ပင်နယ်တီ ကနေ ဂိုးမသွင်းခဲ့ဘူး ၊ ပင်နယ်တီ တာဝန်လည်း မယူခဲ့ပါဘူး ။ ”
” ဒီ အချက်ကို ကျွန်တော်တို့ ထည့်သွင်း စဉ်းစားသင့်ပါတယ် ။ လောလောဆယ်မှာတော့ ပွဲကြည့် ပရိသတ်တွေကို ကွင်းထဲ ပြန်ဝင်ခွင့်ပေးထားလို့ ၊ သူတို့တွေဟာ တီမိုရဲ့ ကြိုးစား အားထုတ်မှုကို မျက်ဝါးထင်ထင် ပြန်မြင်နိုင်ပြီ ဖြစ်ပါတယ် ။ ”
” ကွင်းထဲမှာ မရှိနေတဲ့ အချိန် ၊ ကစားသမား တယောက်ကို ဝေဖန်တာ လွယ်လွန်းတယ်လို့ ထင်ပါတယ် ။ ကွင်းထဲ ရောက်ရင်တော့ ခင်ဗျား ဟာ အဲဒီ ကစားသမားတွေရဲ့ ကွင်းတွင်း ကြိုးစား အားထုတ်မှု ကို အနီးကပ် မြင်ရနိုင်ပါတယ် ။ ဒါက နည်းနည်း ပိုဆက်စပ်မှု ရှိမယ်လို့ ထင်ပါတယ် ။ ” လို့ ပြောကြားခဲ့ပါတယ် ။
