ဂျာမနီလက်ရွေးစင်အသင်း၏ ၀ါရင့်တိုက်စစ်ကစားသမား သောမတ်စ်မူလာက လက်ရှိနည်းပြ ဟန်ဆီဖလစ်ခ် ကိုင်တွယ်ချိန်မှစ၍ မိမိတို့ ဂျာမနီအသင်း ခေတ်သစ်စတင်ခဲ့သည်ဟု ကြုံးဝါးပြောကြားခဲ့သည်။
ဂျာမနီအသင်းသည် ၂၀၂၂ ကမ္ဘာ့ဖလားခြေစစ်ပွဲ နောက်ဆုံးပွဲစဉ်တွင် အာမေးနီးယားကို (၄-၁)ဂိုးဖြင့် အနိုင်ရရှိခဲ့ပြီး (၇)ပွဲဆက် အနိုင်ရလဒ်ရရှိခဲ့သည်။
ဂျာမနီအသင်းသည် ၂၀၂၂ ကမ္ဘာ့ဖလားပြိုင်ပွဲတွင် အစောဆုံးခြေစစ်ပွဲအောင်မြင်သည့်အသင်းအဖြစ် မှတ်တမ်းဝင်ထားပြီး နည်းပြသစ် ဟန်ဆီဖလစ်ခ်လက်ထက်၌ (၇)ပွဲဆက် ရာနှုန်းပြည့်အနိုင်ရရှိခဲ့ခြင်းလည်း ဖြစ်သည်။
ထို့ကြောင့် အာမေးနီးယားနှင့်ပွဲအပြီးတွင် သောမတ်စ်မူလာက ”နည်းပြအပြောင်းအလဲပြုလုပ်ခဲ့ချိန်ကတည်းက ကျွန်တော်တို့ရဲ့ ခေတ်သစ် စတင်ခဲ့တာပါ။ ကျွန်တော်တို့ ကောင်းမွန်တဲ့ လုပ်ဆောင်ချက်တွေ အများကြီးလုပ်ခဲ့ပါတယ်။ ကျွန်တော်တို့ရဲ့ အုပ်စုမှာ အသင်းကြီးတွေ မပါပေမဲ့ ကျွန်တော်တို့အလုပ်ကို ပြီးမြောက်အောင်လုပ်ခဲ့တာကြောင့် လာမယ့်နှစ်ပြိုင်ပွဲကို အခုလို မြင့်မြင့်မားမားပုံစံနဲ့ သွားနိုင်တာပါ”ဟု ပြောကြားခဲ့သည်။
ဂျာမနီအသင်းသည် ဒုတိယနေရာမှ မြောက်မက်ဆီဒိုးနီးယားအသင်းကို (၉)မှတ်ဖြတ်နိုင်ခဲ့သည့်အတွက် သောမတ်စ်မူလာက ယင်းကဲ့သို့ ပြောကြားခဲ့ခြင်း ဖြစ်သည်။
ဟန်ဆီဖလစ်ခ်သည် သြဂုတ်(၁)ရက်နေ့တွင် ဂျာမနီအသင်းကို စတင်တာဝန်ယူကိုင်တွယ်ခဲ့ခြင်းဖြစ်ပြီး ခြေစစ်ပွဲ(၇)ပွဲစလုံး အနိုင်ရရှိခဲ့သည့်အပြင် (၃၁)ဂိုးသွင်းယူပြီး (၂)ဂိုးသာ ပြန်ပေးခဲ့ရသည်။
