အင်္ဂလန်အသင်းသည် ဟန်ဂေရီအသင်းအား ဝင်ဘလေကွင်းတွင် (ဝ-၄)ဂိုးဖြင့် အရေးနိမ့်ပြီးနောက် အသင်းသမိုင်းတစ်လျှောက် အဆိုးရွားဆုံးအိမ်ကွင်းရှုံးပွဲကို ကြုံတွေ့ခဲ့ရကာ နည်းပြဆောက်ဂိတ်ကိုလည်း အသင်းမှ ထွက်ခွာရန် တောင်းဆိုမှုများ မြင့်တက်လာခဲ့သည်။
ယင်းပွဲတွင် ဟန်ဂေရီအသင်းအတွက် ဂိုးများကို ရှယ်လာအီ(၁၆၊ ၇၀ မိနစ်)၊ နာဂျီ (၈၀ မိနစ်)၊ ကော့ဇ်ဒက်(၈၉ မိနစ်)တို့က သွင်းယူပေးခဲ့ပြီး အင်္ဂလန်နောက်ခံလူ ဂျွန်စတုန်းစ်မှာ ၈၂ မိနစ်တွင် နှစ်ဝါတစ်နီဖြင့် ထုတ်ပယ်ခံခဲ့ရသည်။
အင်္ဂလန်အသင်းသည် သမိုင်းတစ်လျှောက် အိမ်ကွင်းပွဲစဉ်တွင် ဂိုးသွင်းနိုင်ခြင်းမရှိဘဲ လေးဂိုးပြတ်အရေးနိမ့်ခြင်းမှာ ပထမဆုံးဖြစ်ပြီး ၁၉၂၈၊ မတ်လက စကော့တလန်အသင်းကို (၁-၅)ဂိုးဖြင့် အရေးနိမ့်ခဲ့ပြီးနောက် အိမ်ကွင်းဂိုးအပြတ်ဆုံးရှုံးပွဲနှင့် ပြန်ရင်ဆိုင်ရခြင်းဖြစ်သည်။
ထို့ပြင် ဟန်ဂေရီအသင်းသည် ၁၉၅၃၊ နိုဝင်ဘာလက အင်္ဂလန်အသင်းကို ဝင်ဘလေကွင်းတွင် (၆-၃) ဂိုးဖြင့် အနိုင်ယူခဲ့ပြီးနောက်ပိုင်း အဝေးကွင်း၌ လေးဂိုးသွင်းယူနိုင်သည့် ပထမဆုံးအသင်းအဖြစ် မှတ်တမ်းဝင်ခဲ့သည်။
အင်္ဂလန်အသင်း နည်းပြ ဆောက်ဂိတ်က ဂိုးပြတ်ရှုံးပွဲအပေါ် ဝေဖန်ပြစ်တင်မှုများအတွက် နာကျင်ခဲ့ရသည်ဟု ဝန်ခံခဲ့ပြီး ကစားသမားများ၏ စွမ်းဆောင်ရည်အပေါ် ကာကွယ်မှုများလည်း ပြုလုပ်ခဲ့သည်။
အင်္ဂလန်တိုက်စစ်မှူးနှင့် အသင်းခေါင်းဆောင်ဖြစ်သူ ဟာရီကိန်းက ဆောက်ဂိတ်သည် အသင်းအတွက် သင့်တော်ပြီး ဦးဆောင်နိုင်သည့် နည်းပြတစ်ဦး ဖြစ်သည်မှာ သံသယရှိစရာမလိုဟု မှတ်ချက် ပြုခဲ့သည်။
လူမှုကွန်ရက်များတွင် နည်းပြ ဆောက်ဂိတ်ကို ထုတ်ပယ်ရန် ပရိသတ်များ၏ တောင်းဆိုမှုများ မြင့်တက်နေပြီး ဘရိုက်တန် နည်းပြ ဂရေဟမ်ပေါ်တာနှင့်အစားထိုးရန် ဆန္ဒရှိနေကြောင်း သိရသည်။
