သြစတြေးလျနှင့်ပွဲမှဂိုးမှာ မက်ဆီအတွက် ကမ္ဘာ့ဖလားရှုံးထွက်အဆင့်တွင် သွင်းယူနိုင်သည့် ပထမဆုံးဂိုးဖြစ်ခဲ့ပြီး ရှုံးထွက်အဆင့်၌ စီရော်နယ်လ်ဒို ဂိုးမသွင်းနိုင်သေး

အာဂျင်တီးနားအသင်းခေါင်းဆောင် တိုက်စစ်မှူး မက်ဆီသည် သြစတြေးလျကို (၂-၁)ဂိုးဖြင့် အနိုင်ရခဲ့သည့် ကမ္ဘာ့ဖလားရှုံးထွက် (၁၆)သင်းအဆင့်ပွဲစဉ်တွင် အသင်းအတွက် အဖွင့်ဂိုးသွင်းယူပေးခဲ့ပြီး ယင်းဂိုးမှာ ၎င်းအတွက် ကမ္ဘာ့ဖလားရှုံးထွက်အဆင့်၌ ပထမဆုံးသွင်းယူနိုင်သည့်ဂိုးအဖြစ် မှတ်တမ်းဝင်ခဲ့ကြောင်း သိရသည်။

မက်ဆီသည် ယခု ၂၀၂၂ ကမ္ဘာ့ဖလားအပါအဝင် ကမ္ဘာ့ဖလားပြိုင်ပွဲ (၅)ခု ယှဉ်ပြိုင်ခဲ့ရာ၌ ၂၀၁၀ ကမ္ဘာ့ဖလားမှလွဲ၍ ကျန်ပြိုင်ပွဲ (၄)ခုတွင် ဂိုးသွင်းနိုင်ခဲ့သည်။ သို့သော် စုစုပေါင်း (၉)ဂိုးသွင်းယူခဲ့ရာ၌ (၈)ဂိုး မှာ အုပ်စုအဆင့်ပွဲစဉ်များတွင်သာ သွင်းယူခဲ့ခြင်းဖြစ်ပြီး ယခုမှ ရှုံးထွက်အဆင့်တွင် ပထမဆုံးဂိုးသွင်းယူနိုင် ခြင်းဖြစ်သည်။

မက်ဆီ (၃၅ နှစ်)သည် ယင်းပွဲတွင် ကစားသမားဘဝပွဲ (၁၀၀၀)ပြည့်ခဲ့ပြီး (၇၈၉)ဂိုးမြောက်အဖြစ် သွင်းယူခဲ့ခြင်းဖြစ်သော်လည်း ကမ္ဘာ့ဖလားသွင်းဂိုးမှာ (၉)ဂိုးသာ ပါဝင်ခဲ့ခြင်းလည်းဖြစ်သည်။

ထို့ပြင် မက်ဆီ ကမ္ဘာ့ဖလားယှဉ်ပြိုင်ခဲ့သည့်ကာလအတွင်း အာဂျင်တီးနားအသင်းမှာ အနိမ့်ဆုံးအဖြစ် ရှုံးထွက် (၁၆)သင်းအဆင့်သို့ ရောက်ရှိခဲ့သော်လည်း ၎င်းအနေဖြင့် အုပ်စုအဆင့်များတွင်သာ ဂိုးသွင်းယူနိုင်ခဲ့ပြီး ယခုပြိုင်ပွဲမှ ရှုံးထွက်အဆင့်သွင်းဂိုးရရှိခဲ့ခြင်းဖြစ်သည်။

ထို့ကြောင့် မီဒီယာများစွာက မက်ဆီ၏ ပွဲ (၁၀၀၀)ပြည့် ထူးခြားသည့်သွင်းဂိုးအဖြစ် ဖော်ပြခဲ့ကြသလို၊ မီဒီယာအချို့က မက်ဆီ၏ မဟာပြိုင်ဘက် စီရော်နယ်လ်ဒိုအနေဖြင့်လည်း ယခုအချိန်အထိ ကမ္ဘာ့ဖလားရှုံးထွက်အဆင့်တွင် ဂိုးသွင်းယူနိုင်ခြင်းမရှိသေးကြောင်း နှိုင်းယှဉ်ဖော်ပြခဲ့သည်။

စီရော်နယ်လ်ဒိုမှာလည်း မက်ဆီနည်းတူ ကမ္ဘာ့ဖလားပြိုင်ပွဲကို (၅)ကြိမ်မြောက်အဖြစ် ယှဉ်ပြိုင်နေခြင်းဖြစ်သည်။  စီရော်နယ်လ်ဒိုသည် မက်ဆီထက် သာလွန်မှုအဖြစ် ယင်းပြိုင်ပွဲ (၅)ကြိမ်စလံုံး၌ ဂိုးသွင်းယူနိုင်ခဲ့သော်လည်း အုပ်စုအဆင့်များတွင်သာ သွင်းယူနိုင်ခဲ့ခြင်းဖြစ်ပြီး ယခုအချိန်အထိ ရှုံးထွက်အဆင့်တွင် ဂိုးသွင်းယူနိုင်ခြင်းမရှိသေးပေ။

စီရော်နယ်လ်ဒို ကမ္ဘာ့ဖလားယှဉ်ပြိုင်သည့် ကာလအတွင်းတွင် ပေါ်တူဂီအသင်းမှာ ၂၀၁၄ ကမ္ဘာ့ဖလားပြိုင်ပွဲတစ်ကြိမ်သာ အုပ်စုအဆင့်မှ လှည့်ပြန်ခဲ့ရသောကြောင့် ရှုံးထွက်အဆင့်ပွဲများစွာ ယှဉ်ပြိုင်ခဲ့ရသော်လည်း ဂိုးမသွင်းနိုင်ခဲ့ခြင်းဖြစ်သည်။

ထို့ကြောင့် ဆွစ်ဇာလန်အသင်းနှင့် ယှဉ်ပြိုင်ရမည့် ရှုံးထွက်(၁၆)သင်းအဆင့်ပွဲစဉ်၌ စီရော်နယ်လ်ဒို ဂိုးသွင်းနိုင်ရန် လိုအပ်နေပြီဖြစ်ကြောင်း မက်ဆီနှင့် နှိုင်းယှဉ်ကာ သုံးသပ်မှုများ ထွက်ပေါ်လာခြင်းဖြစ်သည်။

လက်ရှိအချိန်အထိ ၎င်းတို့နှစ်ဦး၏ ကမ္ဘာ့ဖလားမှတ်တမ်းတွင် မက်ဆီက စုစုပေါင်း (၂၃)ပွဲကစားကာ (၉)ဂိုးသွင်းယူထားပြီး စီရော်နယ်လ်ဒိုက စုစုပေါင်းပွဲ(၂၀)ကစားကာ (၈)ဂိုးသွင်းယူထားသည်။