အင်္ဂလန်တိုက်စစ်မှူးဟောင်း ၀ိန်းရွန်နီက အင်္ဂလန်လက်ရွေးစင်အသင်းနည်းပြ ဆောက်ဂိတ်အနေဖြင့် ဝေးလ်စ်နှင့် ယှဉ်ပြိုင်ရမည့် အုပ်စုနောက်ဆုံးပွဲတွင် တိုက်စစ်မှူး ဟာရီကိန်းကို အသုံးမပြုဘဲ အနားပေးသင့်ကြောင်း အကြံပြုခဲ့သည်။
ရွန်နီသည် The Times တွင် အကြံပြုရေးသားခဲ့ခြင်းဖြစ်ပြီး ”အမေရိကန်နဲ့ပွဲမှာ သူ့ကို ကြည့်ရတာ အီရန်နဲ့ပွဲက ရိုက်ခတ်မှုတွေကို ခံစားနေရသလိုပါပဲ။ ဆောက်ဂိတ်အနေနဲ့ သူ့ကို အီရန်နဲ့ပွဲမှာ ပထမပိုင်းပြီးကတည်းက အနားပေးခဲ့သင့်တာပါ။ ဒါဟာ သူ့ကို ကာကွယ်ပေးနိုင်မယ့်၊ အသင်းအတွက် ကြံ့ခိုင်မှုပြည့်ဝနေအောင် လုပ်ဆောင်နိုင်မယ့် အခွင့်အရေးပါ။ အခု ကျွန်တော်ကတော့ ဟာရီကိန်းကို ဝေးလ်စ်နဲ့ပွဲမှာ အရန်ခုံထိုင်ခိုင်းချင်ပါတယ်”ဟု ဆိုခဲ့သည်။
ဟာရီကိန်းသည် ၂၀၁၈ ကမ္ဘာ့ဖလားပြိုင်ပွဲတွင် သွင်းဂိုး(၆)ဂိုးဖြင့် ဂိုးသွင်းအများဆုံးဆု ရရှိခဲ့သော်လည်း ယခုပြိုင်ပွဲတွင်မူ နှစ်ပွဲကစားပြီးချိန်အထိ ဂိုးသွင်းယူနိုင်ခြင်းမရှိသေးပေ။
