ဘာစီလိုနာအသင်းသည် ငွေသားနှင့် ကစားသမားများအလိုက်ပေး၍ ကမ်းလှမ်းရန် စီစဉ်ထားသော်လည်း အင်တာမီလန်အသင်းက လက်ခံမည်မဟုတ်သောကြောင့် ကော်တင်ဟိုအပါအဝင် ကြယ်ပွင့်ကစားသမားအချို့ရောင်းချ၍ ဘတ်ဂျက်ရှာဖွေရဖွယ်ရှိနေသည်။
ဘာစီလိုနာအသင်းသည် အင်တာမီလန်အသင်း၏ အာဂျင်တီးနားလက်ရွေးစင်တိုက်စစ်မှူး လော်တာရိုမာတီနက်ဇ်ကိုခေါ်ယူရန် ပုဂ္ဂိုလ်ရေးသဘောတူညီမှုရရှိထားပြီဖြစ်ကြောင်း ESPN သတင်းဌာန၏ဖော်ပြချက်အရ သိရသည်။
ဘာစီလိုနာအသင်းသည် အသက် ၃၃ နှစ်ရှိပြီဖြစ်သည့် တိုက်စစ်မှူး လူးဝစ်ဆွာရက်ဇ်၏နေရာတွင် အစားထိုးရန် လော်တာရိုမာတီနက်ဇ်ကို စိတ်ဝင်စားနေခြင်းဖြစ်ပြီး ယခုနွေရာသီတွင် ခေါ်ယူနိုင်ရန် ကြိုးပမ်းလျက်ရှိကြောင်း သတင်း ဌာနများစွာက ဖော်ပြလျက်ရှိသည်။ ESPN ၏ ဖော်ပြချက်အရ ဘာစီလိုနာအသင်းသည် အသက် ၂၂ နှစ်အရွယ်ကစားသမားကို နူးကမ့်သို့ခေါ်ယူရန် နှုတ်အားဖြင့် သဘောတူညီမှုရထားပြီး ပြောင်းရွှေ့ကြေးအတွက် အင်တာမီလန်အသင်း နှင့် ညှိနှိုင်းရန်သာ ကျန်ရှိတော့ကြောင်း သိရသည်။
ဘာစီလိုနာအသင်းသည် ငွေသားနှင့် ကစားသမားများအလိုက်ပေး၍ ကမ်းလှမ်းရန် စီစဉ်ထားသော်လည်း အင်တာမီလန်အသင်းက လက်ခံမည်မဟုတ်သောကြောင့် ကော်တင်ဟိုအပါအဝင် ကြယ်ပွင့်ကစားသမားအချို့ရောင်းချ၍ ဘတ်ဂျက်ရှာဖွေရဖွယ်ရှိနေသည်။ ၂၀၁၈ ခုနှစ် ဇန်နဝါရီတွင် ကလပ်စံချိန်တင်ပြောင်းရွှေ့ကြေး ယူရိုသန်း ၁၆၀ ဖြင့် ခေါ်ယူခဲ့သူ ကော်တင်ဟိုမှာ ယခုနွေရာသီတွင် အသင်းဟောင်း အင်တာမီလန် (သို့မဟုတ်) PSG အသင်းသို့ပြောင်းရွှေ့ရန် ဆန္ဒရှိနေပြီး ၎င်း၏လက်ရှိ ခြေစွမ်းနှင့် ကိုရိုနာဗိုင်းရပ်စ်အကျပ်အတည်းကြောင့် ဘာစီလိုနာအသင်း ငွေကြေးဆုံးရှုံးမှု ရင်ဆိုင်ရနိုင်သည်။ ထို့ပြင် ဘာစီလိုနာအသင်းသည် ဆယ်မီဒို၊ ရာကီတစ်နှင့် ဒမ်ဘီလီတို့ကိုရောင်းချ၍ ဘတ်ဂျက်ရှာဖွေရန် မျှော်မှန်းထား ကြောင်း သိရသည်။
လော်တာရိုမာတီနက်ဇ်နှင့် အင်တာမီလန်အသင်း၏စာချုပ်မှာ ၂၀၂၃ ခုနှစ် ဇွန်အထိ ကျန်ရှိနေသေးပြီး ၎င်းအား စာချုပ်လျော်ကြေး ယူရို ၁၁၁ သန်း (ပေါင်သန်း ၁၀၀) ပေးချေ၍ ခေါ်ယူနိုင်မည့်အခွင့်အရေးမှာ သက်တမ်းကျော် လွန်သွားပြီဖြစ်ကြောင်း စပိန်နိုင်ငံထုတ် Sport သတင်းစာက ဖော်ပြခဲ့သည်။ အင်တာမီလန်အသင်းသည် လော်တာရိုမာတီနက်ဇ်ကို ၂၀၁၈ ခုနှစ် ဇူလိုင်တွင် အာဂျင်တီးနားကလပ် ရေးဆင်းအသင်းမှ ယူရို ၂၂ ဒသမ ၇ သန်းဖြင့် ခေါ်ယူ ထားခြင်းဖြစ်ပြီး နှစ်ရာသီအတွင်း ပြိုင်ပွဲစုံတွင် ၇၃ ပွဲကစား ၂၆ ဂိုးသွင်းယူပေးထားသည်။
၎င်း၏ လက်ရှိစျေးကွက်တန်ဖိုးမှာ ယူရို ၆၄ သန်းဝန်းကျင်သာရှိသော်လည်း အင်တာမီလန်အသင်းကမူ စာချုပ်လျော်ကြေး ယူရို ၁၁၁ သန်းရရှိမှသာ ရောင်းချမည်ဖြစ်ကြောင်း အတည်ပြုထားသည်။ အင်တာမီလန်အသင်းအနေ ဖြင့် အလားအလာကောင်းများပိုင်ဆိုင်ထားသည့် ၎င်းကို ရောင်းချလိုခြင်းမရှိ သောကြောင့် စာချုပ်သက်တမ်း သုံးနှစ်ကျန်ရှိနေသော်လည်း စာချုပ်သစ်ထပ်မံ ချုပ်ဆိုရန် ပြင်ဆင်နေကြောင်း သိရသည်။ ဘာစီလိုနာအသင်းမှာလည်း ကိုရိုနာ ဗိုင်းရပ်စ်၏ သက်ရောက်မှုကြောင့် အင်တာမီလန်အသင်းတောင်းဆိုသည့် ပမာဏကို ပေးချေနိုင်ဖွယ်မရှိကြောင်း သိရသည်။
