PSG အသင်းနည်းပြ ဂယ်လ်ချီသည် လူမျိုးရေးခွဲခြားမှုစွဲချက်ဖြင့် တရားရင်ဆိုင်ရမည်ဖြစ်ပြီး ဒီဇင်ဘာ (၁၅)ရက်တွင် နိုက်စ်မှုခင်းတရားရုံး၌ ကြားနာစစ်ဆေးမည်ဖြစ်ကြောင်း သိရသည်။
ဂယ်လ်ချီသည် နိုက်စ်အသင်းကို ကိုင်တွယ်စဉ်က လူမျိုးရေးခွဲခြားမှုပြုလုပ်ခဲ့သောကြောင့် ဖမ်းဆီးစစ်ဆေးခံခဲ့ရခြင်းဖြစ်သည်။ အသက် (၅၆) နှစ်ရှိပြီဖြစ်သူ ဂယ်လ်ချီသည် နိုက်စ်အသင်းအား ၂၀၂၁-၂၀၂၂ ရာသီတွင် ကိုင်တွယ်ခဲ့ဖူးပြီး အသင်းပိုင်ရှင်များထံ အီးမေးလ်ပေးပို့စဉ် အသင်း၏လူစာရင်း၌ လူမည်းနှင့် မွတ်စလင်ကစားသမား အလွန်များနေကြောင်း ထည့်သွင်းရေးသားခဲ့သည်ဟု စွပ်စွဲခံထားရသည်။
အဆိုပါအီးမေးလ်မှာ ဧပြီလအတွင်း ပေါက်ကြားမှုဖြစ်ပွားခဲ့ခြင်းဖြစ်ပြီး ၎င်းက စွပ်စွဲမှုများအား ငြင်းဆန်ထားသော်လည်း သောကြာနေ့တွင် ဖမ်းဆီးစစ်ဆေးခံရခြင်းဖြစ်သည်။
၎င်းသည် PSG အသင်းနည်းပြရာထူးမှ ထုတ်ပယ်ခံရရန် နီးစပ်နေပြီး စပိန်လက်ရွေးစင်နှင့် ဘာစီလိုနာနည်းပြဟောင်းဖြစ်သူ လူးဝစ်အန်နရီကေးကို PSG အသင်းနည်းပြအဖြစ် ခန့်အပ်တော့မည်ဟု သတင်းများ ထွက်ပေါ်လျက်ရှိသည်။
