လူကာကူကို PSG အသင်း ခေါ်ယူရန် ချိန်ရွယ်နေကြောင်း သတင်းထွက်

PSG အသင်းသည် ချယ်လ်ဆီးအသင်းတွင် ခြေစွမ်းမပြနိုင်ဘဲဖြစ်နေသည့် ဘယ်လ်ဂျီယံတိုက်စစ်မှူး လူကာကူကို ခေါ်ယူရန် ချိန်ရွယ်နေကြောင်း သတင်းထွက်လာခဲ့သည်။

လူကာကူသည် အင်တာမီလန်အသင်းတွင် ခြေစွမ်းပြနိုင်ခဲ့ခြင်းကြောင့် အသင်းဟောင်းချယ်လ်ဆီးက ပေါင်(၉၇)သန်းဖြင့် ခေါ်ယူခဲ့သော်လည်း ရောက်ခါစကာလတွင်သာ ဂိုးသွင်းခြေစွမ်းပြနိုင်ခဲ့ပြီး နောက်ပိုင်းတွင် ရုန်းကန်နေရသည်။

လက်ရှိအချိန်၌ ချယ်လ်ဆီးအသင်းမှာ ပိုင်ရှင်အပြောင်းအလဲဖြစ်ပေါ်တော့မည်ဖြစ်သော်လည်း နည်းပြ သောမတ်စ်တူဟယ်လ်မှာမူ အသင်းတွင် ဆက်ရှိဖွယ်ရှိနေသည်။

ထို့ကြောင့် လူကာကူအနေဖြင့် အသင်းပြောင်းရွှေ့ရန် အလားအလာများနေရာ လာမည့်နွေရာသီတွင် ပြုပြင်ပြောင်းလဲမှုများစွာ ပြုလုပ်ဖွယ်ရှိနေသည့် PSG အသင်းက ချိန်ရွယ်လာခြင်းဖြစ်ကြောင်း သိရသည်။

လူကာကူသည် အဲဗာတန်အသင်းတွင် ယှဉ်ပြိုင်ကစားနေစဉ်က PSG အသင်းနှင့် အပြောင်းအရွှေ့သတင်း ထွက်ခဲ့ဖူးပြီး ယင်းအချိန်ကမူ PSG အသင်းသည် ထိပ်တန်းအသင်းဖြစ်ကြောင်း၊ ကမ္ဘာ့အဆင့်ကစားသမားများနှင့်အတူ ကြီးမားသည့်ရည်မှန်းချက်ရှိနေသည့်အသင်းဖြစ်ကြောင်း ပြောကြားကာ PSG အသင်းကို ပြောင်းရွှေ့လိုသည့်သဘောထားကို ပြသခဲ့ဖူးသည်။