မြန်မာ MMA ကစားသမား အောင်လအန်ဆန် က ဇူလိုင် (၃၀)ရက်၌ ထိုးသတ်မည့် ONE မစ်ဒယ် ၀ိတ်တန်း စိန်ခေါ် ပွဲတွင် လီအန်ဒရိုကို အနိုင်ရရန် အကောင်းဆုံးပြင်ဆင်နေကြောင်း ပြောကြားခဲ့သည်။
အောင်လအန်ဆန်သည် ONE မစ်ဒယ်ဝိတ်တန်း ကမ္ဘာ့ချန်ပီယံဆုကို ပြီးခဲ့သည့်နှစ် အောက်တို ဘာ (၃၀)ရက်က လက်လွှတ်ခဲ့ရပြီး (၉)လအကြာတွင် မစ်ဒယ်ဝိတ်တန်းစိန်ခေါ် ပွဲ ပြန်လည်ထိုးသတ်ခွင့်ရခြင်း ဖြစ်သည်။ အောင်လအန်ဆန်သည် ကစားသမားဘဝတစ်လျှောက် လီအန်ဒရိုနှင့် ပထမဆုံးအကြိမ်ယှဉ်ပြိုင် ထိုးသတ်ရမည်ဖြစ်သည်။
” ဒီပွဲအတွက် အကောင်းဆုံး လေ့ကျင့်ပြင်ဆင်နေပါတယ်။ ပြီးတော့ ယုံကြည်မှုလည်း ရှိလာပါပြီ။ အကောင်းဆုံးပုံစံနဲ့ ထိုးသတ်သွားနိုင်မယ်လို့ ယုံကြည်ပါတယ်။ ပြီးခဲ့တဲ့ပွဲတွေက လိုအပ်ချက်၊ အားနည်းချက်တွေကိုလည်း ပြန်ပြင်ဆင်နေပါ တယ်။ ပြီးခဲ့တဲ့ပွဲတွေမှာ လိုအပ်ချက်တွေ ရှိခဲ့ပါတယ်။ ဒါကြောင့် အကောင်းဆုံးဖြစ်အောင် လေ့ကျင့်နေပါတယ်။ လီအန်ဒရိုက ဂျူဂျစ်ဆုကမ္ဘာ့ချန်ပီယံ (၅)ကြိမ် ရထားသလို ကစားသမားကောင်းတစ်ဦးဖြစ်ပါတယ်။ ဒီပွဲက အရမ်းကိုခက်ခဲနိုင်ပြီး သူ့ရဲ့နပန်း၊ ချုပ်ကွက် တွေနဲ့ တိုက်ခိုက်မခံရအောင် သတိထားရမှာပါ။ သူ့ရဲ့ အားသာချက်တွေကို အကောင်းဆုံး ထိန်းချုပ်နိုင်မယ်လို့ ယုံကြည်ပါတယ်။ သူ့ထက်ပိုကောင်းအောင် ထိုးသတ်နိုင်မယ်လို့လည်း ယုံကြည်ပါတယ်။ လီအန်ဒရိုရဲ့ အားနည်းချက်၊ အားသာချက်တွေကို လေ့လာထားပါတယ်”ဟု အောင်လအန်ဆန်က ONE Championship နှင့် တွေ့ ဆုံမှုတွင် ထည့်သွင်းပြောကြားခဲ့သည်။
အောင်လအန်ဆန်သည် မစ်ဒယ်ဝိတ်တန်း ကမ္ဘာ့ချန်ပီယံအဖြစ် ၂၀၁၇ ခုနှစ် ဇွန်လမှ ၂၀၂၀ ပြည့်နှစ် အောက်တိုဘာလကုန်အထိ ရပ်တည်နိုင်ခဲ့ပြီး နယ်သာလန်နိုင်ငံသား ဒီရစ်ဒါကိုအရေးနိမ့်သဖြင့် ကမ္ဘာ့ချန်ပီယံခါးပတ် လက်လွှတ်ခဲ့ရခြင်းဖြစ်သည်။ အသက် (၃၆ )နှစ်ရှိပြီဖြစ်သူ အောင်လအန်ဆန်သည် MMA ကစားသမားဘဝ (၃၉)ပွဲမြောက် ထိုးသတ် မည်ဖြစ်ပြီး ယခင်ထိုးသတ်ခဲ့သည့် (၃၈)ပွဲတွင် (၂၆) ပွဲနိုင်၊ (၁၂)ပွဲ ရှုံးနိမ့်ကာ နောက်ဆုံးထိုးသတ်ခဲ့သည့် (၂)ပွဲစလုံး ရှုံးနိမ့်ထားသည်။
အသက် (၃၄)နှစ်ရှိပြီဖြစ်သူ လီအန်ဒရိုမှာမူ ပြီးခဲ့သည့်နှစ် ဖေဖော်ဝါရီတွင် ဒီရစ်ဒါနှင့် ထိုးသတ် ပြီးနောက်ပိုင်း တစ်နှစ်ခွဲဝန်းကျင်အကြာမှ စိန်ခေါ်ပွဲ ပြန်လည်ထိုးသတ်ခွင့်ရခြင်းဖြစ်သည်။ လီအန်ဒရို သည် MMA ကစားသမားဘဝ (၁၅) ပွဲထိုးသတ်ထား ရာတွင် (၁၁)ပွဲနိုင်၊ (၄)ပွဲရှုံးနိမ့်ထားပြီး နောက်ဆုံး ထိုးသတ်ခဲ့သည့် (၄)ပွဲမှာ အောင်လအန်ဆန်ထိုးသတ်ခဲ့ဖူးသည့် ပြိုင်ဘက်များနှင့် ယှဉ်ပြိုင်ခဲ့ခြင်းဖြစ်သည်။ လီအန်ဒရိုသည် အောင်လအန်ဆန်ကို (၂)ကြိမ်တိုင် အနိုင်ယူထားသည့် နယ်သာလန်နိုင်ငံသား ဒီရစ်ဒါနှင့် ပူးတွဲလေ့ကျင့်မှုများ ပြုလုပ်လျက်ရှိသည်။
