ဂျာမနီနှင့် ဘိုင်ယန်မြူးနစ်ဂန္ထဝင် လိုသာမက်သီးယက်စ်က လက်ရှိတွင် လီဝန်ဒေါစကီးမှာ ကမ္ဘာ့အကောင်းဆုံးကစားသမားဖြစ်ပြီး ဘာစီလိုနာအသင်းအနေနှင့် မက်ဆီတစ်ဦးတည်းဖြင့် ဘိုင်ယန်မြူးနစ်အသင်းကို ယှဉ်နိုင်မည်မဟုတ်ကြောင်း ပြောကြားခဲ့သည်။
လိုသာမားသီးယက်စ်သည် ဂျာမန်သတင်းစာ Bild နှင့်တွေ့ဆုံရာတွင် ယင်းကဲ့သို့ပြောကြားခဲ့ခြင်းဖြစ်ပြီး လီဝန်ဒေါစကီးမှာ ကမ္ဘာ့အကောင်းဆုံးကစားသမား မက်ဆီ၏နေရာကို ဆက်ခံမည့်သူဖြစ်သည်ဟုလည်း ဆိုခဲ့သည်။
ဘာစီလိုနာနှင့် ဘိုင်ယန်မြူးနစ်အသင်းတို့သည် ချန်ပီယံလိဂ်ကွာတားဖိုင်နယ်အဆင့်တွင် တွေ့ဆုံနေသည်။
အဆိုပါပွဲစဉ်တွင် Ballon d’Or (၆)ကြိမ်အထိ စံချိန်တင်ဆွတ်ခူးထားသည့် မက်ဆီ၏ ဘာစီလိုနာအသင်းကို လီဝန်ဒေါစကီး ဦးဆောင်သည့် ဘိုင်ယန်မြူးနစ်အသင်းက အနိုင်ယူ ကျော်ဖြတ်သွားမည်ဖြစ်ကြောင်း လိုသာမားသီးယက်စ်က ပြောကြားခဲ့ခြင်းဖြစ်သည်။
လိုသာမားသီးယက်စ်က ”မက်ဆီဟာ သောကြာနေ့မှာ ကမ္ဘာ့အကောင်းဆုံးကစားသမားအဖြစ် သူ့နေရာကို ဆက်ခံမယ့် လီဝန်ဒေါစကီးနဲ့ ရင်ဆိုင်ရမှာ ဖြစ်ပါတယ်။ လီဝန်ဒေါစကီးဟာ လက်ရှိမှာ ကမ္ဘာ့အကောင်းဆုံးတိုက်စစ်မှူး ဖြစ်ရုံသာမကပါဘူး၊ ကမ္ဘာ့အကောင်းဆုံးကစားသမားလည်း ဖြစ်ပါတယ်။ ပြီးတော့ လက်ရှိ ဘာစီလိုနာအသင်းက အရင်တုန်းကလို မဟုတ်တော့ပါဘူး။ သူတို့မှာ မက်ဆီ ရှိတယ်။ မက်ဆီလို ကစားသမားမျိုးက ဘယ်လိုမှ မဖြစ်နိုင်ဘူးလို့ထင်တာတွေကို ဖြစ်မြောက်အောင် လုပ်နိုင်စွမ်းရှိတယ်ဆိုတာလည်း အမှန်ပါပဲ။ ဒါပေမဲ့ မက်ဆီ တစ်ယောက်တည်းရှိရုံနဲ့တော့ ဘာစီလိုနာအသင်းအနေနဲ့ ဘိုင်ယန်မြူးနစ်အသင်းကို ယှဉ်နိုင်မှာ မဟုတ်ပါဘူး။ ဘာစီလိုနာအသင်းကို ကျွန်တော်တို့ ကြောက်စရာမလိုပါဘူး”ဟု ပြောကြားခဲ့သည်။
အသက် (၃၁)နှစ်အရွယ်ရှိ ပိုလန်တိုက်စစ်မှူး လီဝန်ဒေါစကီးသည် ယခုရာသီ ချန်ပီယံလိဂ်ပြိုင်ပွဲတွင် (၁၃)ဂိုးအထိ သွင်းယူထားပြီး မက်ဆီမှာ (၃)ဂိုးသာ သွင်းယူထားနိုင်ခဲ့သည်။
ထို့ပြင် လီဝန်ဒေါစကီးသည် ယခုရာသီ ပြိုင်ပွဲစုံ (၄၄)ပွဲတွင် (၅၃)ဂိုးအထိ သွင်းယူထားပြီး မက်ဆီမှာမူ ပြိုင်ပွဲစုံ (၄၃)ပွဲတွင် (၃၁)ဂိုး သွင်းယူထားသည်။
မက်ဆီအနေဖြင့် ခြေစွမ်းပြကစားနိုင်ခဲ့သော်လည်း ဘာစီလိုနာအသင်းသည် လာလီဂါချန်ပီယံဆုကို ရီးယဲလ်အသင်းထံ လွှဲပြောင်းပေးခဲ့ရသလို၊ စပိန်ဘုရင့်ဖလားပြိုင်ပွဲတွင်လည်း ကွာတားဖိုင်နယ်အဆင့်မှ ထွက်ခွာခဲ့ရသည်။ လီဝန်ဒေါစကီးမှာမူ ယခုရာသီတွင် ဘိုင်ယန်မြူးနစ်အသင်းနှင့် ပြည်တွင်းဖလား (၂)လုံး ရယူထားနိုင်ခဲ့ပြီး ကိုရိုနာဗိုင်းရပ်စ်ကပ်ဘေးကြောင့် ယခုနှစ် Ballon d’Or ဆုကို ဖျက်သိမ်းကြောင်း မကြေညာမီက ဆုရရန် ထိပ်ဆုံးမှ ရေပန်းစားခဲ့သူဖြစ်သည်။
