ချန်ပီယံလိဂ်ပြိုင်ပွဲတွင် ဘာစီလိုနာအသင်းနှင့် တစ်အုပ်စုတည်းကျရောက်ပြီးနောက် အသင်းတိုက်စစ်မှူးဟောင်း လီဝန်ဒေါစကီး ဘာစီလိုနာကစားသမားအဖြစ် ပြန်လည်ရောက်ရှိလာချိန်တွင် အသင်းပရိသတ်များအနေဖြင့် လှောင်ပြောင်ခြင်းမရှိဘဲ နွေးထွေးစွာကြိုဆိုလိမ့်မည်ဟု ဘိုင်ယန်မြူးနစ်အသင်းနည်းပြ နာဂယ်စ်မန်းက ယုံကြည်နေကြောင်း သိရသည်။
လီဝန်ဒေါစကီးသည် ဘာစီလိုနာအသင်းသို့ ထွက်ခွာခွင့်ရရှိရန်အတွက် အလွန်အမင်းဖိအားပေးခဲ့သဖြင့် အသင်းတာဝန်ရှိသူများနှင့် ဆက်ဆံရေးအဖုအထစ်ရှိပြီးမှ ပြောင်းရွှေ့သွားခြင်းဖြစ်သည်။
”ကွင်းထဲမှာ လက်ခုပ်သြဘာသံတွေကြားရမယ်လို့ ကျွန်တော် မျှော်လင့်ပါတယ်။ တစ်စုံတစ်ယောက် လှောင်ပြောင်ခံရတာမျိုးကို ကျွန်တော် မနှစ်မြို့ပါဘူး။ ဖြစ်စဉ်အားလုံးကို ကျွန်တော် မသိပါဘူး။ ကွင်းထဲက ပရိသတ်တွေဆိုရင် ပိုလို့တောင်မှ ဝေးပါသေးတယ်။ ဒါဟာ အမြဲတမ်းဖြစ်နေတဲ့ ဒုတိယအမှန်တရားဖြစ်ပြီး နားလည်မှုလွဲတာတွေ၊ ပုံကြီးချဲ့တာတွေ ဖြစ်ခဲ့ပါတယ်”ဟု နာဂယ်စ်မန်းက ပြောကြားခဲ့သည်။
