လီဗာပူးအသင်းသည် လက်ရှိဘောလုံးရာသီတွင် အသင်းလိုက်ခြေစွမ်းပိုမိုကောင်းမွန်ခဲ့ပါက တိုက်စစ်မှူးနူညက်ဇ်အနေဖြင့် ဂိုးပို၍ ရနိုင်မည်ဖြစ်ကြောင်း မန်နေဂျာကလော့ပ်က ထုတ်ဖော်ပြောဆိုလိုက်သည်။ ဘင်ဖီကာမှ ပြီးခဲ့သည့်နွေရာသီတွင် ရောက်ရှိလာသော နူညက်ဇ်သည် ၎င်း၏ပထမဆုံး ပရီးမီးယားလိဂ်ရာသီတွင် လီဗာပူးအတွက် ၁၅ ဂိုးသာသွင်းယူပေးနိုင်ခဲ့သည်။ နူညက်ဇ်၏ အပြောင်းအရွှေ့အတွက် လီဗာပူးသည် ကလပ်အသင်းစံချိန်တင်ပြောင်းရွှေ့ကြေးပေါင် ၈၄ သန်းပေးခဲ့ရသည်။
အသက် ၂၃ နှစ်အရွယ်ရှိနူညက်ဇ်သည် နောက်ဆုံးကစားသည့် ၁၁ ပွဲတွင် ၅ ပွဲသာ ပွဲထွက်ခွင့်ရရှိခဲ့ပြီး သွင်းဂိုး တစ်ဂိုးသာရရှိခဲ့သဖြင့် လီဗာပူး၏ ပထမဦးစားပေးတိုက်စစ်မှူးအဖြစ် ကစားနိုင်ခြင်းမရှိဖြစ်ခဲ့ရသည်။ နူညက်ဇ် အနေဖြင့် ထိုသို့ ရုန်းကန်နေရခြင်းမှာ လီဗာပူး၏ အသင်းလိုက်ခြေစွမ်းမတည်ငြိမ်ခြင်းအပေါ်တွင်လည်း မူတည်နေကြောင်း ကလော့ပ်က ထုတ်ဖော်ပြောဆိုလိုက်သည်။
“နူညက်ဇ်က အသင်းမှာ အချေကျဖို့လိုအပ်နေပါသေးတယ်။ သူ့ရဲ့ခြေစွမ်းကို နောက်ထပ်အများကြီး တွေ့မြင်ရဦးမှာပါ။ တိုက်စစ်မှူးတစ်ဦးအတွက်က အချိတ်အဆက်မမိတဲ့အသင်းမှာ ကစားရတာက ခက်ခဲတတ်ပါတယ်။ ဥပမာ ကျွန်တော်တို့ အမှတ် ၈၀ ကျော်လောက်ရတဲ့ ဘောလုံးရာသီမှာ နူညက်ဇ်ပါဝင်ကစားခွင့်ရရင်တော့ အခုထက်ပိုပြီး ဂိုးတွေသွင်းနိုင်မှာပါပဲ။ အခုတော့ တချို့အခွင့်အရေးတွေကို ဂိုးအဖြစ်အသွင်မပြောင်းနိုင်တဲ့အခါမှာ ဖိအားတွေများလာပါတယ်။ တိုက်စစ်မှူးကောင်းတွေလို့ ပြောရမယ့် ဆာလာလည်း ဂိုးပေါင်း ၄၀ ကျော်သွင်းနိုင်တဲ့ ဘောလုံးရာသီမှာတောင် ဂိုးသွင်းခွင့်တွေကို အသုံးမချနိုင်တာ ရှိပါတယ်။ ဟာလန်းလည်း ဂိုးသွင်းခွင့်ကို အသုံးမချနိုင်တာရှိတာပဲလေ။ ၁၅ ဂိုးက သိပ်မဆိုးပါဘူး။ နောက်ထပ်သုံးပွဲကစားဖို့ရှိပါတယ်။ အရေအတွက် တိုးလာနိုင်ပါတယ်”ဟု ကလော့ပ်က ပြောဆိုလိုက်သည်။
