လီဗာပူးလ်အသင်း၏ အီဂျစ်လက်ရွေးစင်တိုက်စစ်မှူး ဆာလာသည် လာမည့် ဇူလိုင်လနှင့် သြဂုတ်လအတွင်း ကျင်းပမည့် တိုကျိုအိုလံပစ်ပြိုင်ပွဲတွင် ပါဝင်ကစားရဖွယ်မရှိကြောင်း သိရသည်။
တိုကျိုအိုလံပစ်ပြိုင်ပွဲ (ဘောလုံး)တွင် အီဂျစ်ယူ-၂၃ အသင်းမှာ ခြေစစ်ပွဲအောင်ထား၍ (၂၀၁၉ အာဖရိက ယူ-၂၃ ပြိုင်ပွဲတွင် ချန်ပီယံဖြစ်ခဲ့၍)ပါဝင်ယှဉ်ပြိုင်ခွင့်ရထားသည်။
အီဂျစ်ယူ-၂၃ အသင်းနည်းပြ ရှော်ကီဂါရစ်ဘ်နှင့် အီဂျစ်ဘောလုံးအဖွဲ့ချုပ်တာဝန်ရှိသူများသည် ဆာလာ(၂၉ နှစ်)အား အသင်း၏ အသက်ကျော်ကစားသမား(၂)ဦးထဲတွင် တစ်ဦးအဖြစ်ပါဝင်စေရန် ဆန္ဒရှိနေကြသည်။
သို့ုဖြစ်ရာ ယင်းပြိုင်ပွဲတွင် ဆာလာပါဝင်စေရန် စီစဉ်နေကြသော်လည်း သူ၏ကလပ် လီဗာပူးလ်အသင်းက ခွင့်ပြုဖွယ်မရှိ၍ အခက်တွေ့နေကြကြောင်း သိရသည်။
လီဗာပူးလ်အသင်းသည် လာမည့်ရာသီကြိုပြင်ဆင်မှုများနှင့် ရာသီအစပွဲစဉ်များအား ဆာလာလွဲချော်မည်ကို မလိုလား၍ အိုလံပစ်ပြိုင်ပွဲသို့ ဆာလာကို စေလွှတ်ခြင်းမရှိဘဲ ငြင်းဆန်ဖွယ်ရှိနေကြောင်း ဗြိတိန်သတင်းစာများက ဖော်ပြခဲ့သည်။
တိုကျိုအိုလံပစ်ပြိုင်ပွဲမှာ ဇူလိုင်(၂၂) ရက်နေ့တွင် စတင်မည်ဖြစ်ပြီး သြဂုတ်(၇) ရက်နေ့တွင် ပြီးဆုံးမည်ဖြစ်သည်။
လာမည့် ၂၀၂၁-၂၂ ဘောလုံးရာသီ ပရီးမီးယားလိဂ်ပြိုင်ပွဲမှာ သြဂုတ်(၁၄)့ရက်မှ စတင်မည်ဖြစ်ပြီး လီဗာပူးလ်အသင်းမှာ ရာသီအဖွင့်ပွဲအဖြစ် နယူးကာဆယ်အသင်းနှင့် ကစားရမည်ဖြစ်သည်။
ဆာလာအနေဖြင့် ပွဲပန်းသည့်ပြဿနာကြုံတွေ့ ပြီး ရာသီကြိုနှင့်ရာသီအစအသင်း၏ ပွဲများအား လွဲချော်မည်ကို လီဗာပူးလ်အသင်းနည်းပြ ယာဂန်ကလော့ပ်က မလိုလားကြောင်း The Athletic သတင်းစာက ဖော်ပြခဲ့သည်။
အီဂျစ်ဘောလုံးအဖွဲ့ချုပ်ဥက္ကဋ္ဌဖြစ်သူ အာမက်မီဂါဟက်ဒ်က အိုလံပစ်ပြိုင်ပွဲတွင် ဆာလာပါဝင်ရန် ခက်ခဲကြောင်း ဝန်ခံခဲ့သော်လည်း ဆာလာအနေဖြင့် ယင်းပြိုင်ပွဲ၌ ပါဝင်မည်ဟု မိ မိတို့ကို ကတိကဝတ်ပြုထားကြောင်း ပြောကြားခဲ့သည်။
အာဖရိကအကောင်းဆုံးဘောလုံးသမားဆုကို (၂)ကြိမ်ရရှိထားသော ဆာလာသည် အီဂျစ်လက်ရွေးစင်အသင်းအတွက် နိုင်ငံတကာ ပွဲ(၇၀)ပွဲ ကစားကာ (၄၅)ဂိုးသွင်းယူပေးထား ပြီး အီဂျစ်ယူ-၂၃ အသင်းအတွက် ကစားစဉ်က (၁၁)ပွဲကစားကာ (၄)ဂိုး သွင်းယူပေးနိုင်ခဲ့သည်။
