PSG အသင်းက လိုင်လီအသင်းကို (၇-၁)ဂိုးဖြင့် အနိုင်ရခဲ့သည့်ပွဲ၌ PSG တိုက်စစ်ကစားသမား(၃)ဦးဖြစ်သော မက်ဆီ၊ နေမာနှင့် ဘာပေတို့၏ စွမ်းဆောင်ရည်ကို အဆင့်(၉)အဖြစ် L’Equipeက သတ်မှတ်ခဲ့ကြောင်း သိရသည်။
ယင်းပွဲတွင် အဆိုပါတိုက်စစ်ကစားသမား(၃)ဦးစလုံး ခြေစွမ်းပြခဲ့ပြီး ဘာပေက ဟက်ထရစ်သွင်းယူခဲ့သည်။
နေမာက (၂)ဂိုး သွင်းကာ ဂိုးဖန်တီးမှု(၃)ကြိမ် ပြုလုပ်ခဲ့ပြီး မက်ဆီက (၁)ဂိုးသွင်းကာ ဂိုးဖန်တီးမှု(၁)ကြိမ် ပြုလုပ်ခဲ့သည်။
ထို့ကြောင့် အသင်း၏ စွမ်းဆောင်ရည်အကောင်းဆုံးကစားသမားများ ဖြစ်ခဲ့ပြီး ပြင်သစ်လီဂူးပြိုင်ပွဲမှ ကစားသမားများ၏ စွမ်းဆောင်ရည်ကို တွက်ချက်ဖော်ပြပေးနေသည့် L’Equipe က ၎င်းတို့(၃)ဦးစလုံးကို အဆင့်(၉)အဖြစ် သတ်မှတ်ခဲ့ခြင်းဖြစ်သည်။
ပြင်သစ်လီဂူးပြိုင်ပွဲ၏ လက်ရှိချန်ပီယံ PSG အသင်းသည် ယခုရာသီတွင် (၃)ပွဲ ဆက်အနိုင်ရရှိထားသလို၊ အဆိုပါ(၃)ပွဲတွင် (၁၇)ဂိုးအထိ သွင်းယူနိုင်ခဲ့သည်။
PSG အသင်းတွင် တိုက်စစ်ကစားသမားများအကြား အားပြိုင်မှုများရှိနေကြောင်း သတင်းထွက်ပေါ် ခဲ့သော်လည်း ယခုပွဲတွင်မူ ဝေဖန်မှုများကို တိတ်ဆိတ်စေခဲ့ကြောင်းလည်း L’Equipe က သုံးသပ်ဖော်ပြခဲ့သည်။
L’Equipe ၏ သတ်မှတ်ချက်အရ ယင်းပွဲတွင် PSG အသင်း၏ စွမ်းဆောင်ရည်အနိမ့်ဆုံးကစားသမားမှာ နောက်ခံလူ ရာမို့စ်နှင့် ဂိုးသမား ဒွန်နာရမ်မာတို့ ဖြစ်ကြောင်း သိရသည်။
ပြိုင်ဘက်လိုင်လီအသင်းတွင်မူ စွမ်းဆောင်ရည်အဆင့်(၅)ရရှိသူမှာ အမြင့်ဆုံးဖြစ်ပြီး ဂိုးသမား လီယိုယာဒင်းဖြစ်သည်။
