၂၀၂၂-၂၀၂၃ ရာသီ အင်္ဂလန်လိဂ်ဖလား (Carabao Cup) ပြိုင်ပွဲ ဆီမီးဖိုင်နယ်အဆင့်တွင် ဆောက်သမ်တန်နှင့် နယူးကာဆယ်၊ နော်တင်ဟမ်နှင့် မန်ယူအသင်းတို့ တွေ့ဆုံနေပြီး မန်စီးတီးအသင်း ပြိုင်ပွဲမှထွက်ခွာခဲ့ရပြီးနောက် မန် ယူအသင်းသည် ဗိုလ်စွဲရန် ရေပန်းအစားဆုံးအခြေအနေတွင်ရှိနေကြောင်း သိရှိရသည်။
ဆီမီးဖိုင်နယ်ပွဲစဉ်များကို ဗုဒ္ဓဟူးနေ့ညပိုင်းက ယှဉ်ပြိုင်ကစားသည့် ဆောက်သမ်တန်-မန်စီးတီး ကွာတားဖိုင်နယ်ပွဲအပြီးတွင် မဲနှိုက်ရွေးချယ်ခဲ့ခြင်းဖြစ်သည်။
ပွဲစဉ်ရေးဆွဲမှုအရ နောက်ဆုံး(၅)ရာသီတွင် ချန်ပီယံဆု (၄)ကြိမ်အထိရရှိထားသည့် မန်စီးတီးအသင်းကို အံ့အားသင့်ဖွယ် ကျော်ဖြတ်လာသည့် ဆောက်သမ်တန်အသင်းက ပရီးမီးယားလိဂ်၌ ခြေစွမ်းပြနေသည့် နယူးကာဆယ်အသင်းနှင့် လည်းကောင်း၊ ပရီးမီးယားလိဂ်တန်းတက် နော်တင်ဟမ်အသင်းက နာမည်ကြီး မန်ယူအသင်းနှင့်လည်းကောင်း ထိပ်တိုက်တွေ့ဆုံနေသည်။
ဆီမီးဖိုင်နယ်ပွဲစဉ်များကို နှစ်ကျော့ယှဉ်ပြိုင်ရမည်ဖြစ်ပြီး ဇန်နဝါရီ ၂၄-၂၅ ရက်တွင် ပထမအကျော့နှင့် ဇန်နဝါရီ ၃၁-ဖေဖော်ဝါရီ ၁ ရက်တွင် ဒုတိယအကျော့ ကစားရမည်ဖြစ်သည်။ ယခုပြိုင်ပွဲ၌ မန်ယူအသင်းက အလေးပေးမှု ၅း၆ ဖြင့် ဗိုလ်စွဲရန် ရေပန်းအစားဆုံးဖြစ်နေပြီး နယူးကာဆယ်အသင်းက ၆း၄၊ ဆောက်သမ်တန်အသင်းက ၁၁း၁၊ နော်တင်ဟမ်အသင်းက ၁၄း၁ ဖြင့် ရပ်တည်နေသည်။
