ဘာစီလိုနာအသင်းဥက္ကဋ္ဌ လာပေါ်တာက မက်ဆီအပါအဝင် ယခုနွေရာသီတွင် ခေါ်ယူထားသည့် ကစားသမားသစ်များကို မှတ်ပုံတင်ရန်အတွက် လာလီဂါပြိုင်ပွဲ၏လစာကန့်သတ်မှုစည်းမျဉ်းကို ပြောင်းလွယ်ပြင်လွယ်ဖြစ်စေလိုကြောင်း ပြောကြားခဲ့သည်။
လာလီဂါတွင် ပြိုင်ပွဲဝင်အသင်းများအနေဖြင့် ဘဏ္ဍာရေးပြဿနာများကို ဖြေရှင်းနိုင်ရန်အတွက် ၂၀၁၃ ခုနှစ်မှစကာ လစာကန့်သတ်ချက်စည်းမျဉ်းကို စတင်မိတ်ဆက်ခဲ့ကြောင်း သိရသည်။
ယင်းစည်းမျဉ်းအရ ပြီးခဲ့သည့် ၂၀၂၀-၂၁ ရာသီက ကစားသမားများကို တစ်နှစ်လစာ ယူရို(၃၄၇)သန်းအထိ ပေးချေခဲ့သည့် ဘာစီလိုနာအသင်းသည် လာမည့် ၂၀၂၁-၂၂ ရာသီတွင် တစ်နှစ်လစာကို ယူရို သန်း (၁၆၀)အထိ လျှော့ချရမည်ဖြစ်ကြောင်း စပိန်ရေဒီယို RAC 1 က ဖော်ပြခဲ့သည်။
ထို့ကြောင့် ဘာစီလိုနာအသင်းသည် လစာထက်ဝက်လျှော့ယူမည်ဟု သဘောတူညီမှုရထားသည့် အသင်းခေါင်းဆောင် မက်ဆီကို စာချုပ်သစ်ချုပ်ဆိုနိုင်ခြင်း မရှိသေးသလို၊ အဂွဲရိုး၊ ဒီပိုင်းတို့အပါအဝင် ယခုနွေရာသီအပြောင်းအရွှေ့ကာလတွင် ခေါ်ယူထားသည့် ကစားသမားသစ်များကိုလည်း လာလီဂါပြိုင်ပွဲတွင် မှတ်ပုံတင်နိုင်ခြင်း မရှိသေးကြောင်း သိရသည်။
ဘာစီလိုနာဥက္ကဋ္ဌ လာပေါ်တာက လာလီဂါကလပ်အသင်းများအနေဖြင့် ကစားသမားသစ်များ ပိုမိုခေါ်ယူနိုင်ရန်အတွက် လစာကန့်သတ်မှုစည်းမျဉ်းကို ပြောင်းလွယ်ပြင်လွယ်ဖြစ်စေလိုကြောင်း ပြောကြားခဲ့ခြင်းဖြစ်သည်။
လာပေါ်တာက ”ကျွန်တော်တို့အနေနဲ့ ကစားသမားသစ်တွေကို ဘဏ္ဍာရေးသာတူညီမျှစည်းမျဉ်းနဲ့အညီ ခေါ်ယူထားတာကြောင့် အားလုံးကို မှတ်ပုံတင်နိုင်မှာပါ။ လာလီဂါ လစာကန့်သတ်ချက်စည်းမျဉ်းကိုတော့ တခြားလိဂ်တွေက သူတို့ကလပ်တွေအတွက် လုပ်ပေးသလိုမျိုး ပြောင်းလွယ်ပြင်လွယ် ဖြစ်စေချင်ပါတယ်။ ဒါမှလည်း ကျွန်တော်တို့အနေနဲ့ ကစားသမားသစ်တွေကို ထပ်မံခေါ်ယူနိုင်မှာပါ။ ဂီတာဖေးအသင်းဥက္ကဋ္ဌနဲ့လည်း ကျွန်တော် စကားပြောပြီးပါပြီ။ သူကလည်း လစာကန့်သတ်ချက်စည်းမျဉ်းကို ပြောင်းလွယ်ပြင်လွယ်ဖြစ်စေချင်ပါတယ်”ဟု ပြောကြားခဲ့သည်။
ထို့ပြင် လာပေါ်တာက ကစားသမားများကို လစာလျှော့ယူရန်အတွက် တိုင်ပင်ဆွေးနွေးနေပြီး ကစားသမားများဘက်က အသင်းကိုကြည့်ပေးသည့်အတွက် ကျေးဇူးတင်ကြောင်းလည်း ဆိုခဲ့သည်။
