အက်သလက်တီကိုအသင်းနည်းပြ ဆီမြွန်နီသည် လာလီဂါပြိုင်ပွဲသမိုင်းတစ်လျှောက် ကလပ်အသင်းတစ်သင်းတည်းကို ပွဲအများဆုံးကိုင်တွယ်သည့် နည်းပြအဖြစ် (၄၂၅)ပွဲဖြင့် မှတ်တမ်းသစ်တင်ခဲ့သည်။
ဆီမြွန်နီသည် ရီးယဲလ်အသင်းနှင့်အတူ စံချိန်တင်ထားသော ဂန္ထဝင်နည်းပြ မီဂွယ်လ်မူနော့ဇ်၏ (၄၂၄)ပွဲကို ကျော်ဖြတ်ခဲ့ခြင်းဖြစ်သည်။
“ကျွန်တော်တို့ရဲ့ ပရိသတ်တွေ ကွင်းထဲကနေ ပျော်ရွှင်စွာနဲ့ ထွက်ခွာခဲ့ရတယ်ဆိုတာ သံသယရှိစရာမလိုပါဘူး။ အသင်းရဲ့စွမ်းဆောင်ရည်အတွက်လည်း ဂုဏ်ယူမိပါတယ်” ဟု ဆီမြွန်နီက ပြောကြားခဲ့သည်။
ဆီမြွန်နီသည် ယင်းပွဲတွင် အက်သလက်တီကိုအသင်းကို ကိုင်တွယ်မှု ပြိုင်ပွဲစုံ (၆၁၂)ပွဲ ရှိခဲ့ပြီး အသင်းဂန္ထဝင်နည်းပြ အာရာဂူးနက်စ် တင်ရှိထားသော ပွဲအများဆုံးကိုင်တွယ်သည့် ပွဲအရေအတွက်ကို လိုက်မီခဲ့သည်။
၎င်းအနေဖြင့် ပြိုင်ပွဲစုံ(၆၁၂)ပွဲတွင် (၃၅၈)ပွဲနိုင်၊ (၁၄၃)ပွဲသရေ၊ (၁၁၁)ပွဲရှုံးမှတ်တမ်းရှိခဲ့ပြီး အာရာဂူးနက်စ်မှာမူ (၃၀၈)ပွဲနိုင်၊ (၁၃၅)ပွဲသရေ၊ (၁၆၉)ပွဲရှုံးနိမ့်ခဲ့သည်။
