မန်ယူနိုက်တက် ကစားသမားဟောင်း လူး၀စ်ဆာဟာက လာမည့်ရာသီ အာဆင်နယ်ရဲ့ အထက်မှာ ရပ်တည်နိုင်မယ့် အသင်း ၄ သင်းကို ခန့်မှန်းသွားခဲ့ပါတယ်။ အာဆင်နယ်ဟာ ပြီးခဲ့တဲ့ ရာသီက ပရီးမီးယားလိဂ်ဖလားကို ဆွတ်ခူးနိုင်ရန် နီးစပ်ခဲ့ပေမယ့်လည်း ရာသီကုန်ခါနီးမှာ ခြေချော်လက်ချော် ဖြစ်သွားခဲ့တာကြောင့် စီးတီးရဲ့ ကျော်ဖြတ်ခြင်းကို ခံလိုက်ရပြီး ရာသီကုန်မှာ ချန်ပီယံနဲ့ ၅ မှတ်အကွာ ဒုတိယနေရာနဲ့ ကျေနပ်လိုက်ရပါတယ်။
ဆာဟာက လီဗာပူးဟာ လာမည့်ရာသီ မန်စီးတီးရဲ့ အဓိက ပြိုင်ဘက် အဖြစ် ပြန်လည် ပေါ်ထွက်လာလိမ့်မယ်လို့ ယုံကြည်နေပြီး ချဲလ်ဆီး နဲ့ သူ့ရဲ့ အသင်းဟောင်း မန်ယူနိုက်တက် တို့ကလည်း ဂန်းနား တို့ရဲ့ အထက်မှာ ရပ်တည်နိုင်လိမ့်မယ်လို့ ဆိုသွားပါတယ်။ ချဲလ်ဆီးနဲ့ လီဗာပူး တို့ဟာ ပြီးခဲ့တဲ့ ရာသီက ရုန်းကန်ခဲ့ရပြီး the Blues တို့ဟာ အဆင့် ၁၂ နေရာသာ ရခဲ့တဲ့ အပြင် လီဗာပူးကနေ ချန်ပီယံလိဂ် ၀င်ခွင့်နဲ့ လွဲချော်ခဲ့ပါတယ်။
လာမည့်ရာသီ ဘယ်အသင်းက မန်စီးတီးရဲ့ အဓိက ဖလား ပြိုင်ဘက် ဖြစ်လာမလဲဆိုတဲ့ မေးခွန်းကို ဆာဟာက “ကျနော် ကတော့ လီဗာပူးဟာ ပြန်လည် နိုးထလာလိမ့်မယ်လို့ ယုံကြည်နေပါတယ်။ သူတို့ဟာ မန်စီးတီးရဲ့ အဓိက ပြိုင်ဘက် ဖြစ်လာဖို့ အများဆုံးပါ။ ပြီးခဲ့တဲ့ ရာသီက စွမ်းဆောင်ရည်ကြောင့် လူအများစုက အာဆင်နယ် ဖြစ်နိုင်တယ် ဆိုပြီး ပြောနေကြမှာပါ။
ဒါပေမယ့်လည်း သူတို့ ဒီနွေရာသီမှာ ကောင်းမွန်တဲ့ ကစားသမားတွေ ခေါ်ယူနိုင်ခဲ့မယ် ဆိုရင်တောင် ကျနော်ကတော့ အာဆင်နယ်တို့ လာမည့်ရာသီမှာ မန်စီးတီး လီဗာပူး မန်ယူနိုက်တက် နဲ့ ချဲလ်ဆီး တို့ရဲ့ အထက်မှာ ရပ်တည်နိုင်မယ် ဆိုရင် အံ့သြမိမှာ ဖြစ်ပါတယ်။” လို့ ဆိုလိုက်ပါတယ်။
