လာမည့် ၂၀၂၀-၂၁ ရာသီ ပရီးမီးယားလိဂ်ပြိုင်ပွဲတွင် ဆောင်းရာသီအနားပေးချိန် ထားရှိမည်မဟုတ်ကြောင်း သိရသည်။
ပရီးမီးယားလိဂ်တွင် ဆောင်းရာသီအနားပေးချိန်ကို ပြီးခဲ့သည့်ရာသီကမှ စတင်ထားရှိခဲ့သော်လည်း လာမည့်ရာသီသစ် အစပြုမည့်အချိန်မှာ ကိုရိုနာကပ်ဘေးကြောင့် နောက်ကျခဲ့သည့်အတွက် ဆောင်းရာသီအနားပေးချိန်ကို ဖျက်သိမ်းလိုက်ခြင်းဖြစ်သည်။
ပရီးမီးယားလိဂ်ရာသီသစ်ကို ပုံမှန်အတိုင်းဆိုလျှင် သြဂုတ်လ၌ စတင်လေ့ရှိသော်လည်း ကိုရိုနာဗိုင်းရပ်စ်ကပ်ဘေးကြောင့် ၂၀၁၉-၂၀ ရာသီသိမ်းချိန် နောက်ကျခဲ့ကျခဲ့ကြောင့် လာမည့် ၂၀၂၀-၂၁ ရာသီ ပရီးမီးယားလိဂ်ပြိုင်ပွဲကို စက်တင်ဘာ (၁၂)ရက်တွင် စတင်ကစားမည်ဖြစ်သည်။
ပရီးမီးယားလိဂ်အဖွဲ့ချုပ်သည် ရာသီသစ်အတွက် ပွဲစဉ်ဇယားကို ဩဂုတ်လ(၂၁)ရက်နေ့ထက် နောက်မကျဘဲ ထုတ်ပြန်ပေးသွားမည်ဖြစ်ကြောင်းလည်း အတည်ပြုကြေညာခဲ့သည်။
၂၀၂၀-၂၁ ရာသီ စတင်မည့်အချိန်မှာ ပုံမှန်ထက် (၅)ပတ်ခန့် နောက်ကျမည်ဖြစ်သဖြင့် ပွဲစဉ်ဇယားရေးဆွဲရာတွင် အခက်တွေ့နိုင်ကြောင်း BBC သတင်းဌာနက ဖော်ပြခဲ့သည်။
