ရီးယဲလ်ဝါရင့်တောင်ပံကစား သမား ဂါရတ်ဘေးလ်သည် လာမည့်ရာသီတွင် အသင်း၌ဆက်ကစားရန် ဆုံးဖြတ်လိုက်ပြီဖြစ်ကြောင်း AS သတင်းစာက ဖော်ပြခဲ့သည်။
အသက် (၃၂)နှစ်အရွယ်ရှိ ဝေးလ်စ်တောင်ပံကစားသမား ဘေးလ်သည် ရီးယဲလ်အသင်းနှင့် ၂၀၂၂ ခုနှစ်အထိ စာချုပ်သက်တမ်းရှိနေသော်လည်း ယခုနွေ ရာသီအပြောင်းအရွှေ့ကာလတွင် အသင်းမှထွက်ခွာဖွယ်ရှိနေသည်ဟု သတင်းများထွက်ပေါ်နေသူဖြစ်သည်။
သို့သော် AS သတင်းစာ၏ ဖော်ပြချက်အရ ဘေးလ်သည် အသင်းနည်းပြ အန်ဆယ်လော့တီနှင့် တိုင်ပင်ဆွေးနွေးပြီးနောက် ရီးယဲလ်အသင်းတွင် စာချုပ်သက်တမ်းကုန်ဆုံးသည်အထိ ကစားရန် ဆုံးဖြတ်ခဲ့ခြင်းဖြစ်ကြောင်း သိရှိရသည်။
ဘေးလ်သည် ရီးယဲလ်အသင်းတွင် ယခင်နည်းပြ ဇီဒန်းနှင့် အဆင်မပြေသော်လည်း လက်ရှိနည်းပြ အန်ဆယ်လော့တီနှင့် ကောင်းမွန်သည့် ဆက်ဆံရေးရှိကြောင်း သိရှိရသည်။
ထို့ကြောင့် ဘေးလ်သည် ရီးယဲလ်အသင်းတွင် ၂၀၂၁-၂၂ ရာသီကုန်အထိ ကစားမည်ဖြစ်ပြီး ယင်းနောက်တွင် အမေရိကန်မေဂျာလိဂ်ပြိုင်ပွဲသို့ ပြောင်းရွှေ့ကစားဖွယ်ရှိနေကြောင်း သိရသည်။
