ယခုနွေရာသီတွင် PSG အသင်းနှင့် စာချုပ်သက်တမ်းကုန်ဆုံးမည်ဖြစ်သည့် အာဂျင်တီးနားတိုက်စစ်မှူး မက်ဆီသည် ဆော်ဒီလိဂ်သို့ ပြောင်းရွှေ့တော့မည်ဟု ထင်ကြေးပေးခံနေရသော်လည်း ဥရောပမီဒီယာအချို့ကမူ လာမည့်ရာသီတွင် အသင်းဟောင်း ဘာစီလိုနာ၌ ပြန်ကစားပြီး ၂၀၂၄ ခုနှစ်ရောက်မှသာ ဆော်ဒီသို့ ပြောင်းရွှေ့ကစားရန် ဆန္ဒရှိနေကြောင်း သုံးသပ်ဖော်ပြခဲ့သည်။
မက်ဆီသည် ယခုဇွန်လအတွင်း အသက်(၃၆)နှစ်ပြည့်မည်ဖြစ်သော်လည်း ထိပ်တန်းကစားသမားတစ်ဦးအဖြစ် ခြေစွမ်းပြနိုင်ဆဲဖြစ်သောကြောင့် ခေါ်ယူလိုသည့်ကလပ်အသင်းများစွာရှိနေသည်။ သို့သော် လစာနှုန်းထားမြင့်မားစွာ ပေးချေရမည်ဖြစ်သောကြောင့် ခေါ်ယူနိုင်မည့်အသင်း အနည်းငယ်သာရှိပြီး လက်ရှိအချိန်၌ အသင်းဟောင်း ဘာစီလိုနာ၊ မေဂျာလိဂ်ကလပ် အင်တာမိုင်ယာမီအသင်းနှင့် ဆော်ဒီလိဂ်မှ ကလပ်အသင်းတစ်သင်းထံသို့သာ ပြောင်းရွှေ့ကစားဖွယ်ရှိကြောင်း သိရသည်။
မက်ဆီကို ခေါ်ယူရန် ဆော်ဒီလိဂ်ကလပ် အယ်လ်ဟီလယ်အသင်းက အသည်းအသန်ကြိုးပမ်းနေသလို၊ တစ်နှစ်လစာ ယူရိုသန်း(၄၀၀)ကျော်ဖြင့် ကမ်းလှမ်းထားသောကြောင့် ခေါ်ယူနိုင်ရန် အလားအလာအကောင်းဆုံးဖြစ်နေကြောင်း သိရသည်။ သတင်းအချို့က ယင်းအသင်းသို့ မက်ဆီ ပြောင်းရွှေ့ရန် သေချာနေပြီဟုပင် ဖော်ပြခဲ့သည်။
သို့သော် Goal.com အပါအဝင် မီဒီယာအချို့ကမူ မက်ဆီသည် အသင်းဟောင်း ဘာစီလိုနာတွင် တစ်ရာသီကစားပြီးမှ အယ်လ်ဟီလယ်အသင်းထံ ပြောင်းရွှေ့ရန်အတွက် ဆော်ဒီကလပ်အသင်းတာဝန်ရှိသူများနှင့် ညှိနှိုင်းနေကြောင်း ဖော်ပြခဲ့သည်။
ထို့ပြင် မက်ဆီ၏ အေးဂျင့်အဖြစ် ဆောင်ရွက်နေသည့် ဖခင်ဖြစ်သူ ဟော်ဟဲမက်ဆီကလည်း ဘာစီလိုနာအသင်းဥက္ကဋ္ဌ လာပေါ်တာနှင့် တွေ့ဆုံဆွေးနွေးမှု ပြုလုပ်ခဲ့ပြီးနောက် မက်ဆီသည် ဘာစီလိုနာအသင်းတွင် ပြန်ကစားရန် ဆန္ဒရှိနေသည်ဟု အတည်ပြုပြောကြားခဲ့သည်။
