လာမည့် ၂၀၂၂ ခုနှစ်တွင် ရီးယဲလ်မက်ဒရစ်တိုက်စစ်မှူး ဘန်ဇီမာ ချိုးဖျက်နိုင်ဖွယ်ရှိသည့်စံချိန်အချို့ကို Marca သတင်းစာက ဖော်ပြခဲ့သည်။
အသက်(၃၄) နှစ်အရွယ်ရှိ ဘန်ဇီမာသည် လက်ရှိတွင် ရီးယဲလ်အသင်းအတွက် ပြိုင်ပွဲစုံသွင်းဂိုး (၂၉၉)ဂိုးအထိ သွင်းယူထားပြီး ကလပ်အသင်းသမိုင်းတစ်လျှောက် တတိယဂိုးအများဆုံးသွင်းသူ ဒီစတီဖာနို(၃၀၈ ဂိုး)ကို ကျော်ဖြတ်ရန် နီးစပ်နေကာ ဒုတိယအများဆုံး ရာအူးလ် (၃၂၃ ဂိုး)ကိုလည်း ဖြတ်ကျော်နိုင်ရန် အခွင့်အရေးရှိနေသည်။
ထို့ပြင် ပြင်သစ်ကစားသမားများထဲတွင် ပြိုင်ပွဲစုံ ဂိုးသွင်းအများဆုံး အွန်နရီ(၄၁၁ ဂိုး)ကို ကျော်ဖြတ်ရန်မှာလည်း (၁၀)ဂိုးသာ လိုအပ်တော့သည်။
ဘန်ဇီမာသည် ယခုရာသီတွင် ပြိုင်ပွဲစုံ (၂၀)ဂိုးသွင်းယူထားပြီး ရီးယဲလ်အတွက် သူ၏တစ်ရာသီသွင်းဂိုးအများဆုံးဖြစ်သည့် ၂၀၁၁-၁၂ ရာသီက (၃၂)ဂိုးစံချိန်ကိုလည်း လိုက်မီရန် နီးစပ်နေကြောင်း သိရသည်။
