မန်ယူနည်းပြ တန်ဟက်ဂ်က လာမည့်နွေရာသီအပြောင်းအရွှေ့ကာလတွင် အသင်းမှ ပြင်သစ်တိုက်စစ်မှူး မာစီယဲလ်အား ရောင်းချမည်ဆိုခြင်းကို ငြင်းဆန်ပြောကြားခဲ့သည်။
မာစီယဲလ် (၂၇ နှစ်)သည် မန်ယူအသင်းနှင့် ၂၀၂၄ ခုနှစ်အထိ စာချုပ်သက်တမ်းရှိနေသော်လည်း ဒဏ်ရာပြဿနာများကြောင့် ခြေစွမ်းမပြနိုင်သည့်အတွက် လာမည့်နွေရာသီ အပြောင်းအရွှေ့ကာလတွင် ရောင်းထုတ်ခံရမည်ဟု သတင်းများထွက် ပေါ်နေသည်။
သို့သော် ချယ်လ်ဆီးနှင့် ကစားခဲ့သည့် ပရီးမီးယားလိဂ်ပွဲစဉ်အတွက် ပွဲကြိုမီဒီယာတွေ့ဆုံမှုတွင် မန်ယူအသင်းအနေဖြင့် မာစီယဲလ်အား ရောင်းထုတ်မည်ဆိုခြင်းမှာ မဟုတ်မှန်ကြောင်း တန်ဟက်ဂ်က ပြောကြားခဲ့ခြင်းဖြစ်သည်။
တန်ဟက်ဂ်က “မာစီယဲလ်ကို ရောင်းထုတ်မယ်လို့ ဖော်ပြနေကြတာတွေက မဟုတ်ပါဘူး။ တိုက်စစ်မှူး တစ်ဦး ပွဲမကစားနိုင်တဲ့အခါ ဒါမှမဟုတ် ဂိုးမသွင်းနိုင်တဲ့အခါ ဒီလိုသတင်းမျိုးတွေ ထွက်လာတတ်ပါတယ်။ မာစီယဲလ်ကစားနိုင်ရင် အသင်းက ပိုကောင်းပြီး ပွဲတွေအနိုင်ရလေ့ရှိပါတယ်။ သူက ပွဲတွေ ကစားနိုင်ရင် ဂိုးတွေလည်း သွင်းယူနိုင်မှာပါ” ဟု ပြောကြားခဲ့သည်။
မာစီယဲလ်သည် ယခုရာသီတွင် မန်ယူအသင်းအတွက် ပြိုင်ပွဲစုံ (၂၇) ပွဲတွင်(၈)ဂိုးသွင်းကာ ဂိုးဖန်တီးမှု (၃)ကြိမ် ပြုလုပ်ထားသည်။