ပီအက်စ်ဂျီအသင်းမှ ထွက်ခွာလိုက်ပြီဖြစ်သော မက်ဆီသည် ၎င်း၏အနာဂတ်ကို လာမည့်နာရီပိုင်းအတွင်း ကြေညာမည်ဖြစ်သည်။ မက်ဆီ၏ဖခင်နှင့်အေးဂျင့်ဖြစ်သူ ဂျော်ဂျီသည် ဘာစီလိုနာအသင်း ဥက္ကဌလာပေါ်တာနှင့်ဆွေးနွေးမှုများပြုလုပ်ခဲ့သော်လည်း မက်ဆီသည် ဘာဆာသို့ ပြန်ရန်အလားအလာနည်းကြောင်း မီဒီယာများက ဖော်ပြသည်။ ဘာစီလိုနာသည် ငွေကြေးအခက်အခဲများကြောင့် မက်ဆီအတွက် ကမ်းလှမ်းမှုတစ်ခု ပြုလုပ်ရန်ပင် ခက်ခဲသည့်အနေအထားတွင် ရှိနေကြောင်းလည်း သတင်းများဆက်လက်ထွက်ပေါ်လာသည်။
မက်ဆီ၏လစာမှာ များပြားလွန်းသောကြောင့် ဥရောပကလပ်အသင်းတချို့က ၎င်းကိုစိတ်ဝင်စားသော်လည်း ကမ်းလှမ်းမှုပြုလုပ်နိုင်ခြင်းမရှိဖြစ်နေသည်။ မက်ဆိကို ဆော်ဒီကလပ် အယ်လ်အီတီဟက်နှင့် အမေရိကန်ကလပ်အင်တာမိုင်ယာမီတို့ ကမ်းလှမ်းထားကြသည်။
မက်ဆီသည် ဘာဆာအသင်းသို့ ပြန်ရန်ဆန္ဒရှိသော်လည်း ၎င်း၏အနာဂတ်နှင့်ပတ်သက်သော ဆုံးဖြတ်ချက်ကိုလည်း အချိန်အကြာကြီးမဆွဲပဲ အမြန်ချမှတ်လိုနေသည်။
