အာဆင်နယ်အသင်းနည်းပြ အာတီတာက လာမည့်ဇန်နဝါရီအပြောင်းအရွှေ့ကာလတွင် ကစားသမားသစ် ခေါ်ယူရေးနှင့်ပတ်သက်ပြီး အသင်းတိုက်စစ်မှူးုဖြစ်သူ ဂါဘရီယဲလ်ဂျေးဇူး၏ ဒဏ်ရာအခြေအနေကို စောင့်ကြည့်သွားမည်ဖြစ်ကြောင်း ပြောကြားခဲ့သည်။
အသက် ၂၅ နှစ်အရွယ်ရှိ ဂျေးဇူးသည် ဒီဇင်ဘာ ၂ ရက်က ကင်မရွန်းအသင်းအား (၀-၁) ဂိုးဖြင့် ရှုံးနိမ့်သည့် ၂၀၂၂ ကမ္ဘာ့ဖလား အုပ်စုနောက်ဆုံးပွဲစဉ်တွင် ဘရာဇီးလ်အသင်းအတွက် ကစားရင်း ဒူးဒဏ်ရာရရှိခဲ့ခြင်းဖြစ်သည်။ ဂျေးဇူးသည် အဆုုိပါဒဏ်ရာကို ယခု ရက်သတ္တပတ်အစောပိုင်းက ခွဲစိတ်ကုသမှု ခံယူခဲ့ရာ အောင်မြင်ခဲ့ကြောင်း သိရှိရသည်။ သို့သော် ဂျေးဇူးသည် အဆိုပါဒဏ်ရာကြောင့် ကမ္ဘာ့ဖလားပြိုင်ပွဲကို လွဲချော်ခဲ့သလို အာဆင်နယ်အသင်း၏ လက်ကျန်ရာသီအများစုကိုလည်း လွဲချော်ဖွယ်ရှိကြောင်း မီဒီယာများက ဖော်ပြနေကြသည်။
သို့သော် အာဆင်နယ်နည်းပြ အာတီတာကမူ ဂျေးဇူး၏ ဒဏ်ရာအခြေအနေကို စောင့်ကြည့်ရဦးမည်ဖြစ်ပြီး မည်မျှအနားယူရမည်ကို မပြောနိုင်သေးကြောင်း ပြောကြားခဲ့သည်။ အာတီတာက “ဂျေးဇူး ဘယ်လောက်နားရမယ်ဆိုတာကို မပြောနိုင် သေးပါဘူး။ ကျွန်တော်တို့အနေနဲ့ သူ့ရဲ့ ဒူးဒဏ်ရာကို တစ်နေ့ပြီးတစ်နေ့၊ တစ်ပတ်ပြီး တစ်ပတ် စောင့်ကြည့်သွားရမှာပါ။ ဂျေးဇူး ဒဏ်ရာက အပြောင်းအရွှေ့အစီအစဉ်အပေါ် သက်ရောက်မှုရှိလားဆိုတော့ ရှိပါတယ်။ သူက အသင်းအတွက် အများကြီးပေးဆပ်ထားသူပါ။ ကျွန်တော်တို့အနေနဲ့ ဘယ်လောက် နားရမယ်၊ ဘယ်တော့ပြန်ကစားနိုင်မယ်ဆိုတာကို သိရတဲ့အချိန်မှပဲ အပြောင်းအရွှေ့ စျေးကွက်မှာ ဘာလုပ်ရမယ်ဆိုတာကို ဆုံးဖြတ်သွားမှာပါ။ အသင်းရဲ့လူစာရင်းက အရမ်းကောင်းတယ်လို့ ကျွန်တော် ခံစားရပါတယ်။ ဒါပေမဲ့ ကံမကောင်းစွာပဲ ဒဏ်ရာပြဿနာတွေနဲ့ ကျွန်တော်တို့ ကြုံနေရတယ်။ ကျွန်တော်တို့အနေနဲ့ အသင်းကို တောင့်တင်းအောင် လုပ်နိုင်မလားဆိုတာ ကြည့်ရမှာပါ” ဟု ပြောကြားခဲ့သည်။
အာဆင်နယ်အသင်း၏တိုက်စစ်တွင် ဂျေးဇူး ဒဏ်ရာရရှိခဲ့သဖြင့် တိုက်စစ်မှူးစစ်စစ်ဆို၍ အန်ကယ်တီယာ တစ်ဦးတည်းသာ ကျန်ရှိတော့ကြောင်း သိရှိရသည်။ အန်ကယ်တီယာသည် လိုင်ယွန်အသင်းကို (၃-၀) ဂိုးဖြင့် အနိုင်ရသည့်ပွဲတွင် ပွဲထွက်ကစားခဲ့ ပြီး အာဆင်နယ်အတွက် ဒုတိယဂိုးကို သွင်းယူပေးခဲ့သည်။ အာဆင်နယ်အသင်းသည် လိုင်ယွန်နှင့်ပွဲပြီးနောက် အေစီမီလန်၊ ဂျူဗင်တပ်စ်တို့နှင့် ထပ်မံခြေစမ်းသွားမည်ဖြစ်ကြောင်း သိရသည်။ အာဆင်နယ်အသင်းသည် ပရီးမီးယားလိဂ်တွင် ၁၄ ပွဲကစားအပြီးတွင် ရမှတ် ၃၇ မှတ်ဖြင့် အမှတ်ပေးဇယား ကို ဦးဆောင်နေပြီး ဒီဇင်ဘာ ၂၆ ရက်တွင် ဝက်စ်ဟမ်းနှင့် ကစားရမည်ဖြစ်သည်။
