မန်ယူအသင်းနည်းပြ တန်ဟက်ဂ်က ယနေ့ယှဉ်ပြိုင်ကစားရမည့် ပြိုင်ဘက် လက်စတာအသင်းသည် ပင်ကိုလက္ခဏာ အမှန်တကယ်ကောင်းမွန်သည့်အသင်းဖြစ်သည်ဟု သြဂုတ် ၃၁ ရက်ကပြုလုပ်ခဲ့သော ပွဲကြိုသတင်းစာရှင်းလင်းပွဲတွင် ချီးကျူးခဲ့သည်။
လက်စတာအသင်းသည် ရာသီအဖွင့်ပွဲစဉ်တွင် ဘရန့်ဖို့ဒ်ကို သရေကျပြီးနောက် အာဆင်နယ်၊ ဆောက်သမ်တန်၊ ချယ်လ်ဆီးအသင်းတို့ကို ဆက်တိုက်အရေးနိမ့်ခဲ့ခြင်းဖြစ်သည်။
“ပွဲအတော်များများ(လက်စတာအသင်းပွဲ)ကို ကျွန်တော် ကြည့်ခဲ့ပါတယ်။ ပြီးခဲ့တဲ့ရာသီတွေက သူတို့ဘယ်လောက် ကောင်းခဲ့သလဲဆိုတာ ကျွန်တော်တို့ သိပါတယ်။ အခု သူတို့ကစားခဲ့တဲ့ပွဲတွေကိုလည်း ကြည့်ထားကြပြီးပြီလို့ ကျွန်တော် ယူဆပါတယ်။ သူတို့ရဲ့ပင်ကိုလက္ခဏာက မြင်ရတာ အမှန်တကယ်ကောင်းပါတယ်။ သူတို့က ဘောလုံးကို ကောင်းကောင်းကစားနိုင်ပါတယ်။ ဒါကြောင့် အဲဒီမှာ ရလဒ်ကောင်းရဖို့ ကျွန်တော်တို့ အမှန်တကယ်ကောင်းရပါမယ်” ဟု တန်ဟက်ဂ်က ပြောကြားခဲ့သည်။
ထို့ပြင် တန်ဟက်ဂ်က နောက်ခံလူ လင်ဒီလော့ဖ်သည် အသင်းနှင့် လေ့ကျင့်ခန်းဆင်းနေပြီး မာစီယဲလ်မှာမူ ထပ်မံလွဲချော်မည်ဟု အတည်ပြုခဲ့သည်။
