ရှုံးပွဲကြုံတွေ့ခဲ့သည့် ထီရယ်လ်ထန်ကို အောင်လအန်ဆန် အားပေးစကားပြောကြား

ONE Battleground III ပြိုင်ပွဲတွင် တောင်ကိုရီးယားနိုင်ငံသား ဆောင်မင်ဂျောင်ကို ရှုံးနိမ့်ခဲ့သည့် မြန်မာ MMA ကစားသမား ထီရယ်လ်ထန်အား အောင်လအန်ဆန်က အားပေးနှစ်သိမ့်စကား ပြောကြားခဲ့သည်။

အောင်လအန်ဆန်က ”အကောင်းဆုံး ပုံစံနဲ့ မင်းပြန်လာမယ်ဆိုတာ ငါသိနေတယ်။ မင်းထိုးသတ်မယ့် နောက်ပြိုင်ပွဲကျရင် စင် ထောင့်မှာ ငါရှိနေပါ့မယ်။ အဲဒီပွဲမှာ မင်းသေ ချာပေါက် အနိုင်ရပါလိမ့်မယ်။ မထိုးသတ်ခင် အချိန်မှာတော့ ခက်ခဲတဲ့နေ့တွေကို ရင်ဆိုင် ကျော်ဖြတ်ကြရတာ ပုံမှန်ပါပဲ။ အဲဒါကိုက ဘဝပဲ။ မင်းအတွက် ငါအမြဲဂုဏ်ယူနေပါတယ်။ ငါသိပါတယ်။ MMA ပြိုင်ပွဲတွေက အခုမှ မင်းအတွက် အစပဲရှိသေးတယ်ဆိုတာကိုပေါ့။ ကချင်နဲ့ ချင်းတိုင်းရင်းသားတွေဆိုတာကလည်း ညီအစ်ကိုတွေပါပဲကွာ”ဟု အားပေးစကားပြောကြားခဲ့ခြင်းဖြစ်သည်။

ချင်းတိုင်းရင်းသား ထီရယ်လ်ထန်သည် ဆောင်မင်ဂျောင်နှင့် ထိုးသတ်ခဲ့သည့်ပွဲတွင် ပထမအချီနှင့် ဒုတိယအချီ၌ လက်ရည်အသာစီးရခဲ့သော်လည်း တတိယအချီတွင် လက်ရည်ပြန်နိမ့်ကာ အထိနာခဲ့သည်။

သုံးချီအပြီး ဒိုင်သုံးဦးက အမှတ်ဖြင့် ဆုံးဖြတ်ရာတွင် ထီရယ်လ်ထန် ရှုံးနိမ့်ခဲ့ခြင်းဖြစ်သည်။

ထီရယ်လ်ထန်သည် ONE MMA ပြိုင်ပွဲ လေးပွဲထိုးသတ်ရာ သုံးပွဲနိုင်၊ တစ်ပွဲ ရှုံးနိမ့်ထားသည်။